Radio online, fonte JND – Komisaun Anti Korupsaun (KAK) kuaze halo servisu tinan tolu ona, maibe seidauk tata koruptor ida, tamba KAK ninia nehan alias lei seidauk kompletu atu tata koruptor sira.

Nehan tolu ka lei tolu ne’ebe KAK presiza uza ba koruptor sira mak hanesan; Lei komisaun anti korupsaun, lei brankeiamentu kapitais no lei testamunha nune’e bele fo kompetensia ba KAK tata koruptor sira ne’ebe mak gosta foti osan estadu nian ba tau bolsu.

Lei tolu ne’e iha ona Parlamentu Nasional (PN), maibe seidauk deskuti iha espesialidade, lei ne’e kuandu PN aprova ona n Prezidenti da Republika promulga, KAK bele tata ona koruptor sira.

“PN tenki hare ona lei tolu husi KAK ne’e, lei testamunha, investigasaun modelhu forensik no brankeiamentu kapitais nune’e KAK bele iha nehan atu tata. KAK mos tenki involve iha prosesu  ho lei nunee para kondis ho servisu ne’ebe sira halo,”dehan Prezidenti Conselhu Juventude Timor-Leste (CNJTL), Leovigildo Hornai ba JND iha Ote Timor, Dili.

Prezidenti CNJTL hatutan, PN tenki kria lei ne’ebe mak forte hodi fo kbi’it ba orgaun judisiariu liliu ba tribunal, prokurador jeral, PDHJ, KAK no inspektur jeral ne’ebe servisu ho forsa politika. Maibe lei no rekursu tenki kualidade nune’e KAK bele halao ninia knar ho diak.

“Ita atu kombate KKN iha TL ne’e sei frakeza, tanba ita nia sistema lei ba KAK ladiak, kompetensia no rekursu ne’ebe investe nee menus,”dehan Leovigildo.

Nia esplika liutan, sistema ne’ebe KAK iha mak sira investiga deit no rekomenda  ba prokuradoria. Ne’e problema ida ne’ebe mak presiza hare ho didiak.

Ikus liu prezidenti ba foin sae sira sublinha, kuandu atu reforsa KAK hodi halakon KKN, save importante ne’e iha Primeiru Ministru Kay Rala Xanana nia liman, tanba nia (Xanana) mak iha politika no autoridades legal no poder atu fo ninia vontade tomak hodi rezolve problema ne’e.