Prezidenti Repúblika (PR), Taur Matan Ruak, marka ona eleisaun lejizlativa ba iha loron 22 fulan-Jullu tinan 2017. Informasaun ne’e Radio Liberdade asesu liu husi karta komunikadu imprensa husi gabinete PR Kuarta Feiea 03/05/17.

Prezidenti Repúblika, deside atu marka loron eleisaun lejizlativa, tanba konsidera katak nia iha obrigasaun atu asegura lala'ok regulár instituisaun demokrátika sira-nian to'o nia mandatu nia rohan no mós katak labele atraza tan markasaun ba eleisaun tanba bele afeta ba kalendáriu eleitorál.

“ Hein katak atividade hotu-hotu ne'ebé mak envolve iha prosesu eleisaun ba Parlamentu Nasionál, inklui resenseamentu, hatama kandidatura, halo kampaña, vota, fó sai rezultadu eleitorál no konstitui Parlamentu Nasionál no Governu foun, sei la'o ho livre, justu no hakmatek, atu nune'e prosesu eleisaun hirak-ne'e bele sai festa demokrasia ida tan” tenik Prezidenti.

Entertantu  lei Parlamentár  iha hela  tribunál  rekursu hodi hare ninia konstitusionalidade.

Jakarta, Radio Liberdade:  Aliansi  Jurnalis Independen (AJI) ejiji ba guvernu Indonesia atu  kontinua investiga  kazu oho jornalista Indonesia  nain walu  ne’ebe  to’o agora seidauk  hatene autor husi kazu ne’e.

Jornalista nai’n walu  ne’e inklui Agus Mulyawan ne’ebé mate iha Timor-Leste wainhira  halo kobertura konabá  referendum Timor-Leste iha tinan 1999.

Iha semináriu loron Mundiál Liberdade Impresa ne’ebé hala’o iha loron 01/05/17 iha Jakarta Convention Centre (JCC), orador,  Iman D. Nugroho, iha  divizaun Advokasia AJIi, hateten presija hare fila fali ba istoria pasadu  liliu serbisu jornalista nian iha tempu governasaun Prezidenti Soharto nian ne’ebé hanehan  tebes Sebisu Jornalista nian.

“ita labele haluha ita nia pasadu, ita tenki ejeji atu halo justisa ba ita nia maluk jornalista na’in walu ne’e, to’o ohin loron,  la halo evetigasaun ba autor ne’ebe oho sira ”

iha semináriu ne’e,  levanta mos asuntu Papua ne’ebé to’o agora  la oportunidade ba jornalista estrajeiru atu halo kobertura iha fatin ne’e.

tuir informasaun husi jornalista Papua ne’ebe  partisipa mos iha semináriu  ne’e hateten sira seidauk iha liberdade tomak atu foti infomasaun. Maske Prezidenti Atuál Indonesia, Joko Widodo, fó sai ona deklasaun katak jornalsita husi estrajeiru bele halo kobertura ia papua.

Prezidenti Aji, suwarjono iha nia intervensaun hateten presija koalia mos ho ukun na’in no siguransa sira atu komprende didiak serbisu jornalismu nian.

Semanáriu loron mundiál Imprensa ne’e sei hala’o durante Loron ha’at husi loron 01-04 fulan Maiu no tuir ajenda eis premiadu nobel paz, José Ramos Horta, mos sai hanesan orador ba iha seminariu ne’e.

Tinan ida ne’e Indonesia mak sai hanesan uma na’in ba selebrasaun loron Mundiál Imprensa.

Prezidenti  Repúblika (PR) Taur Matan Ruak, Tersa feira  25/04/2017  promulga ona Lei Pensaun Vitalísia, hafoin simu tiha Tribunál Rekursu nia dezisaun katak lei refere la  iha inkonstitusionál.

Iha nia komunikadu imprensa ne’ebé Radio Liberdade asesu liu husi gabinete Media Prezidenti katak  maske nia promulga ona maibe nia rasik lakohi  sai benefisiariu ba lei ne’e hafoin nia mandatu remata

Iha mensajen ne'ebé haruka ho promulgasaun ba Parlamentu Nasionál, Prezidente Repúblika hateten dala ida tan katak nia kontra pensaun vitalísia ka defende ninia aprosimasaun ba sistema protesaun sosiál sidadaun sira seluk nian hodi fó posibilidade ba benefisiáriu sira atu hetan pensaun ho idade ne'ebé ezije mós ba sidadaun sira seluk atu hetan reforma.

 Prezidenti Repúblika lembra hikas katak nia sempre defende modelu dezenvolvimentu ida ne'ebé foka liu ba ema no promove kondisaun moris ne'ebé di'ak liután ba komunidade sira iha kondisaun igualdade.

“Prezidente Repúblika mantein nafatin nia pozisaun, promulga ona Lei Pensaun Vitalísia"tanba tuir lei ida-ne'e, montante pensaun ne'ebé mak atu fó ba polítiku sira ki'ik liu kompara ho montante sira-ne'ebé hatuur iha lei daudaun nian, ne'ebé ida-ne'e kona loloos ho Prezidente Repúblika nia vontade atu halakon Pensaun Vitalísia” Tenik Prezidenti liu Komunikadu Imprensa

Molok aprova Lei pensaun Vitalisa ne’e Xefi Estadu, Taur Matan Ruak, veta  no haruka ba Tribunál rekursu hodi hare nia konstituisionalidade.

Atuál  Premeira  Dama, Isabél Fereira, husu ba partidu Polítiku sira ne’ebé ejiste iha Timor-Leste ho kumpri no hakru’uk ba lei ne’ebé vigora iha nasaun ida ne’e

Primeira Dama  dama hato’o lia  hirak iha  semináriu ba dala rua nulu resin ida 21 kona ba Papél sidadaun nia iha dezenvolvimento Bem-Estar ho Sub-Tema  Paz Justisa no  Toleránsia hodi bele konsolida indepedénsia nasionál, ne’ebé realiza iha Centro Convençoes Dili (CCD)Kinta-feira 20/04/17.

“ Partidu Polítiku sira  ne’ebe mak atu partispipa iha Eleisaun Parlamentar  tenke Kumpri lei no hakru’uk ba lei tanba sira ne’e forsa polítiku” hateten  Primeira Dama.

Fereira hatutan tan katak, bolu  instituisaun kompotente  sira mai hodi fahe imformasaun ba públiku, liliu ba eleitor  foun  sira hodi prepara  didi’ak ba eleisaun parlamentar.

Iha fatin hanesan  Prezidenti  Komisaun Funsaun Públiku,  Faustino Cardoso , iha nia diskursu haforsa tan katak  funsionáriu Públiku  sira  hanesan sidadaun eskoilidu  tenke sai ezemplar ba komunidade.

“funsionáriu públiku mós nu’udar sidadaun entaun sira mós iha direitu dever síviku atu ba ejerse sira-nia direitu no tenke sai ezemplár ba komunidade” hatete prezidente komisaun funsaun públika.

Iha Semináriu ne’e hetan partisipasaun másimu husi  instituisaun sira hanesan Tribunál Rekursu (TR), Comição Nacional das Eliçoes(CNE), Sekretário Técnico  Administração Eleitoral (STAE) no Comição Função Público (CFP), no seluk mak mak hanesan dosente estudante universitáriu sira inklui mós Partidu Politiku sira .