Sekretária Estadu Apoiu  Promosaun Sosiu Ekonómiku Feto , halao enkontru ho grupu trabalhador  Jéneru munisipal hodi halo revizaun  governu kona-ba mekanizmu grupu traballu jéneru nian, enkontru ne’e Iha salaun SEM , sesta Sexta Feira 21/04/17

Abertura ba enkontru ne’e Diretór Nasionál Abordagem Integrada Jéneru no Kapasitasaun Feto Henrique da Siva hateten, atu hare no identifika progresu no dezafius sira nebe mak durante nee implementa ona iha munisípiu no ministériu sira kona-ba sensível jéneru.

“ohin ita halo enkontru ne’e koalia progresu no dezafiu no obstákulu sira tanba ida ne’e  enkontru ne’e atu buka solusaun hamutuk ” hateten Diretór Nasionál Henrique Da Silva

Iha fatin hanesan Diretór Jerál SEM Armando Da Costa iha nia intervista hateten objetivu husi enkontru interminesteriál no intermunisipal nee hodi kolia konaba mekanizmu grupu trabalho generu durante nee .

“ohin ita koalia kona-ba mekanismu grupu traballu generu ne’ebé durante ne’e lao hela ho rezulasaun tinan 2011, no ami hanoin katak tempu to’o ona para atu revizaun ba ida ne’e” hateten diretor jeral Armando da Costa.

Enkontru ne’e organisa husi SEM no  hetan partsipa husi Prezidente grupu trabalhador jéneru munisipal,  no funsionáriu husi SEM.

Prezidenti  eleitu, Francisco Guterres Lú-Olo, hasoru malu ho atuál  Prezidente da Repúblika, Taur Matan Ruak (TMR), hodi ko’alia kona-ba tomada de posse ba  Prezidenti eleitu ne’ebé mak sei monu iha loron 20 fulan Maiu tinan ne’e.

Hafoin  enkontru ne’e, eleitu prezidente informa ba jornalista sira katak servisu tranzisaun sei la’o ho di’ak.

“PR husu  ha’u para bele hasoru malu, ohin ami nain rua koalia kona-ba assuntu tomada de posse iha dia 20 de Maiu, prosesu sira ne’e ami mak ami na’in rua ko’alia no servisu tranzisaun ne’e la’o ho di’ak ” informa Lú-Olo ba Jornalista sira iha Palasiu Prezidenti Aitarak-Laran Sesta Feira

Prezidenti  eleitu informa liután katak, sei delega ekipa trazisaun hodi mai servisu hamutuk ho ekipa kaza sivíl hodi  prepara ba tomada de posse ne’ebé lidera husi Doutor Francisco Vasconselhos.

“seidauk iha Casa Civil, maibé ekipa ne’e prontu ona atu mai ekipa ne’e kuaze nain walu hanesan ne’e  mak mai ajuda preparasaun ne’e ” hatutan Eis Prezidente Parlamentu ne’e. 

Alén de ne’e Xefi Casa Civil, Rui Gomes, akresenta tan oras ne’e dadaun prepara ona hodi servisu  hamutuk ho ekipa tranzisaun.

“ami prepara dadaun ona, tantu Segunda Feira sira mai ami sei diskuti preparasaun buat sira ne’e ” akresenta Assesor ne’e.

Antes atu halo tomada de posse presidente liuhusi Ministériu Negósiu Estranjéiru no Kooperasaun (MNEK) halo ona konvite ba nasaun walu mak sei mai partisipa iha eventu  tomada de posse ne’e.

Brigadeiru Jenerál, Filomeno Paixaõ,  hasoru malu  ho Prezidenti Repúblika, Taur Matan Ruak, hodi  aprezenta relatóriu semanál konaba dezenvolvimentu  Falintil-Forsa Defeza Timor-Leste (F-FDTL) nian ba Xefi Estadu.

Brigadeiro Paixaõ, hateten iha enkontru  ne’e koalia liu konaba formasaun ba autoridade marítima no  oras ne’e dadaun instituisaun F-FDTL  aprezenta ona opsaun tolu ba guvernu no hein dezisaun hodi hatene  lolos konaba se mak sei iha poder atu kaer autoridade maritima ne’e.

 “Autoridade Maritima dadaun ne’e  iha Ministru Defeza nia okos, no oras ne’e dadaun atu estabelese sistema autoridade maritima ho nune’e aprezenta ona opsaun tolu ba guvernu mak hanesan autoridade maritimu sei kaer husi ministru defeza, jeneral  no brigadeiru” tenik Paixão  ba jornalista sira  iha Palasiu Prezidenti  Aitarak-Laran Kuarta Feira 19/04/17.

Nia informa liu tan iha  ona planu  atu  aumenta tan  kompnente aero iha instituisaun F-FDTL.

Dili- Radio Liberdade: Sekretáriu Estadu Komunikasaun Sosiál liuhusi Diresaun Nasionál Sentru Rádiu Komunidade (CRC)  Servisu parseria organizasaun hoUNICEF hodi  divulga Planu Asaun Nasionál husi  Komisaun Direitu Labarik nian liliu kona-ba Promove Direito Labarik

Diretor Nasionál Sentru Rádiu Komunidade, Luis Evaresto Soares,  iha nia entrevista informa katak Papel Sekretáriu Estadu Komunikasaun Sosiál nia mak atu garantia ba labarik hotu-hotu iha territoriu Timor laran tomak hodi asesu ba infomasaun ne’ebé divulga liu husi Rádiu Komunidade tanba rádiu komunidade besik liu komunidade sira.

“Papel SEKOMS oinsá atu garante katak labarik hotu hotu asesu hotu ba informasaun no respeitu tomak ba direitu labarik sira” hateten Evaresto, ba jornalista sira iha JL Villa Fatuhada Tersa Feira 18/4/2017.

Diretor Rádio Komunidade ne’e realsa tan katak estasaun ne’ebé hahu divulga uluk ona programa direitu labarik mak Rádiu Komunidade husi Viquequqe, Ermera, no Maliana.

Iha fatin hanesan, Komisária Direito Labarik, Maria Barreto, mós hateten  média sai hanesan parte ida ne’ebé mak importante tebes, hodi desimina informsaun ba komunidade sira ne’ebé interese ba direitus labarik nia.

Tuir ajenda, diskursu abertura ba sorumutu ne’e husi Sekretáriu Estadu komunikasaun Sosiál Nelio Isaac Sarmento, maibé  la marka prezensa, tanba iha atividade seluk, no sorumutu ne’e hetan  partisipasaun másimu husi média imprime, eletrónika  no  online  inklui jornalista husi Munisípiu sira .