Longuinhos US$1000.00 ba eventu Freestyle DXR-JXR

Radio, online - Komisariu Polisia Nasional Timor-Leste Longuinhos Monteiro pesoalmente fo apoiu osan rihun ida ($1000.00) ba Komisaun Organizadora The East Timor hodi realiza eventu freestyle motor husi Grupu Dili Xtreme Raider (DXR) ho Jogjakarta Xtreme Rider’s (JXR) Indonesia ne’ebe sei halao iha loron 19 agora hodi anima povu Timor- Leste partisipa selebrasaun festa Independentesia Timor-Leste ba dala 11 (20 de Maio 2002 -20 de Maio 2013). 

Longuinhos dehan, orsamentu ne’e nia fo apoiu, tanba nia rasik gosta kopera ho aktividade desportu sira hanesan, freestley motor, Off Road, no aktividade desportu seluk tan.
   
“Hau pesoalmente apoiu rihun ida, hodi ajuda  imi realize eventu ne’e ho diak,” dehan Longuinhos bainhira halao inkontru ho ekipa The East Timor hodi trasa planu ba eventu freestyles ne’e iha Quartel Jeral PNTL Kaikoli Dili, foin lalais ne’e.   

Longuinhos dehan, aktividade freestyle motor nudar eventu desportivu automof ida hodi hatudu talentu juventudi sira bele dezenvolve diak liutan hodi anima komunidade.

Nia dehan, PNTL husi parte tranzitu sei fo apoiu siguransa durante eventu ne’e halao to remata iha palasiu governu.

Iha fatin hanesan, Kordenador Eventu Freestyle Motor The East Timor, Joel Exposto hato agradese ba laran luak komisariu PNTL nian.

Joel hatutan, atu realiza eventu ne’e sira mos hetan apoiu fundus husi Sekretariu Estadu Juventudi Desportu (SEJD), Miguel Manetelo liu husi despaisu Vice PM Fernando Lasama Araujo ho montante $2700.00 ne’ebe sei prosesu hela hodi intrega ne’osan no total orsanmentu ne’ebe iha agora hamutuk hamutuk rihun $4.600, ne’ebe hetan mos suporta husi loza balun iha Dili laran, ne’ebe parseria diak ba aktividades free style.

Husi orsamentu ne’ebe iha, Joel dehan, sira nia ekipa uza osan hodi boking tiket aviaun Dili-Jakarta ba player nain 4 mai husi Jakarta-Indonesia hanesan, Leopoldo Moniz, Tricapun, Dimas Dabens, Delio Martins ne’ebe sei to iha Timor-Leste iha Kuarta (15/05) ho aviaun Sriwijaya Air.

Player sira ne’e mai sei kopera ho player sira husi Dili Extrim Raider, hanesan, Tito Martins, Delio Martins, Ajui Pereira, Jony Bairopite, , Oki Moniz, Moza Martins no membru seluk tan. Ba orsamentu ne’ebe iha komisaun utilija aluga ekipamentus no preparasaun ba otel no seluk tan.

“Ho fundus ne’ebe ami hetan husi governu no donator sira ami sei utilija hodi realiza eventu ne’e ami povu TL ba ita nia festa independensia bele hare talentu ne’ebe juventudi TL ho Indonesia hatudu liu husi freesytle motor,” tenik Joel.

Nia hato agradese ba apoiu hotu husi governu, komisariu Longuinhos no donator sira hodi realiza eventu ne’e bele lao diak liutan.