Governu Aprova Osan Ba Sea Games

Dili, Radio Online, Governu  Aprova orsamentu  700 Milloens ba Sea games, liu husi  Sekretariu Estadu Juventude no Desportu,  iha Kinta-feira, 5/3/2015, iha SEJD Lecidere.

Sekretariu estadu Juventude no Desportu Leovigildo Hornai hateten asina akordu no aprova ona orsamentu $ 700 milloens ba sea games, orsamentu hirak ne’e  sei responsabiliza husi komite olimpiku.

“husi parte governu husu atu ezekuta orsamentu sira ne’ebe iha ho prinsipiu transparansia no kontabilidade, hodi aloka lolos ba nessesidade ne’ebe presija iha eventu refere, liliu tenke asegura mos ba nessesidade atleta sira nian”,dehan Hornai.

Hornai akresenta tan, hanesan Sekretariu Estadu Juventude Desportu reprezenta mos governu hodi ezije ou solisita atu bele hetan medalia iha kompetisaun ga modalidade sira ne’ebe mak ita reprezenta.

“importante liu mak sira tenke hatudu rezultadu ne’ebe mak hanesan uluk iha Myanmar, ita hetan ouru ka osan mean”, tenik Hornai.

Hornai espera jogu iha Singapura nia rezultadu sei diak liu tan, ne’e hanesan fo espiritu ka determinasaun ho vontade ba atleta sira para atu bele kompete ho orgullu hanesan ema Timor, reprezenta povu no nasaun, tenke hatudu ba mundu katak Timor mos bele.

“Hornai husu ba atleta sira no treinador sira no ba ema ne’ebe hola parte iha prossesu ne’e, tenke fo liman ba malu, konsolida unidade ne’ebe mak forte, hatur metin espiritu hanesan ema Timor oan, atu bele manan iha prossesu kompetisaun ne’e, tenke fila ho rezulta pozitivu, tamba povu Timor-leste hein saida mak atu oferese”, tenik Hornai.

Iha fatin hanesan Presidente Confederasaun Desportu Timor-leste (CDTL), Higinho Trindade hateten Governu aprona ona orsamentu 700 milhoens para bele partisipa iha sea games ba dala 28 iha singapura no bele ajuda iha prossesu preparasaun, “preparasaun ba sea games desde novembru 2014, maibe efetivu liu iha janeiru to mai agora”,dehan Trindade.