Radio, online – Eis Ministru Negosiu Estranjeiru no Kooperasaun, Zacarias Albano da Costa sai nudar Prezidenti Komisaun Instaladora Asosiasaun Amizade Timor-Leste-China (AATL-C) ho nia estrutura organika tomak.
Serimonia lansamentu AATL-C ne’e iha Timor Plaza, Segunda (2/12), iha andar 4 salaun balldrom Suai.
Tuir Zacarias hari’I AATL-C ho vizaun ida atu hametin tan lasus amizade entre Timor-Leste ho China, ne’ebe estabele tiha ona.
Hari AATL-C ne’e nudar pasu historiku ida husi inisiativa hothotu ne’ebe mak kontribui ba fortalesimentu relasaun amizade entre nasaun rua nian, ho sentidu ida klean liu tan no integradu iha aspektu hothotu husi relasionamentu diak, entre komunidade nasaun rua ne’e quer iha nivel lukrativu ekonomia, industria nomos relasaun humanu hanesan turizmu, civiku, kultura no akademiku ne’ebe importante tebes ba China, liliu mai TL iha futuru.
Amizade entre TL-China, laos deit estadu rua ne’e, maibe povu ho povu. “Ita sosiedade sivil mos bele hari’i relasaun ida que metin ho organizasoens sosiedade sivil iha China nian. Amizade ho solidariedade mak sai valores importante hodi hari AATL-C ne’e,”Zacarias informa.
Tuir Zacarias, agora dadaun iha TL abitua tiha bolu China mak Jingjang, maibe keta haluha katak, nasaun China ne’ebe bo’ot, iha potensialidades barak no iha oportunidades barbarak. Ho kondisaun China nian agora ne’e, ba oin liu husi asosiasaun presiza aprovita hodi bele ajuda governu hodi hari’i no halao dezenvolvimentu iha TL.
Asosiasaun ne’e, laos deit ba ema China Timor deit, maibe ba ema hotu iha TL bele tama iha asosiasaun ne’e. “Hothotu hamutuk mak ami hari’i Asosiasaun ne’e hodi sai forte no bele promove amizade entre TL-China,”Zacarias informa.
“Timor oan hotu-hotu bele tama iha asosiasaun ne’e, laos deit ba ema Timor no laos deit ba ema China Timor. Maibe ba ema Timor oan hotu. Asosiasaun ne’e la kahur ho membru governu no estadu, asosiasaun ne’e sosiedade sivil mak sei partisipa,”Zacarias esplika.
Liu husi asosiasaun ne’e, sei promove kondisaun TL nian ba iha rai liur atraves husi China. Asosiasaun ne’e mos sei koalia ho emprezarius China nian mai iha TL hodi bele investe iha nasaun ne’e.
“Ba futuru ita atu halo negosiu diak ho China, ita mos tenki hatene koalia China nia lian,”Zacarias sujere.
AATL-C hetan ofisial lansamentu husi Vise Ministru Negosiu Estranjeiru no Koopersaun, Costancio Pinto. Ba jornalista Vise MNEK, Costancio Pinto dehan, asisiasaun amizade TL-China, ne’e importante tebtebes ho objetivu atu hametin relasaun amizade povu TL ho povu China.
Vise MNEK ne’e hatutan, relasaun TL ho povu Chineses hahu kleur los ona, komersiante Chineses hahu kedas iha tasi ibun iha zona costeiras, iha ona relasoens komersiu entre Timor oan ho komersiante Chineses sira. Negosiu mak hanesan, ai-kameli, bani-ben, lilin nsst.
Iha luta ba libertasaun nasional, nasaun China apoiu barak tiha ona mai TL, hahu kedas Timor-Leste Proklama ninia Independensia iha1975.
Iha ukun-an China apiu maximu ba kapasitasaun forsa F-FDTL alende ne’e mos estabele gabinete hanesan edifisiu MNEK, Palacio Prezidensial no edifisiu Quartel Jeral F-FDTL.
“Asosiasaun ninia ejistensia ne’e diak liutan, tanba atu reforsa diak liutan, hametin diak liutan relasaun entre povu TL-China iha futuru. Bele sai mos ponte ligasaun entre governu TL ho governu China ba prosesu dezenvolvimentu nasaun rua ne’e,”Costancio afirma.
Prezensa iha lansamentu AATL-C ne’e mai husi, Prezidenti Asosiasaun TL ho Portugal, Mari Alkatiri, Embaissador China mai TL nomos membru Deputadu sira balun.