Radio, online - Dili, 11 Dezembru 2013. Vise Primeiru Ministru, Fernando La Sama de Araujo, ne’ebe mos oras ne’e dadaun kaer kargu nu’udar Primeiru Ministru interino, Tersa-feira horseik (10/12), iha ninia gabineti, Palacio do governu, simu vizita ofisial hosi embaixador India mai Timor-Leste, Gurjit Singh.

Iha enkontru ne’ebe hala’o iha pelmenus minutu 30 nia laran ne’e, embaixador Singh hateten katak governu no povu India admira ho susesu hosi povu no estadu Timor-Leste nian hodi determina ninia destinu rasik, hodi nune’e, India mos iha komitmentu ne’ebe forte hodi fo apoiu mai povu no nasaun ida ne’e.


Embaixador Singh mos realsa katak, hodi hametin liu-tan relasaun ne’ebe iha ona, India prontu fo apoiu mai governu Timor-Leste iha area dezenvolvimentu rekursu humanus no dezenvolve mos koperasaun iha setor komersiu ho nasaun Timor-Leste.

Hatan ba kistaun hirak ne’e, Vise Primeiru Ministru La Sama esplika katak maske hasoru obstaklu oin-oin, maibe povu no governu ida ne’e iha sentimentu fiar-an nafatin hodi dezenvolve rai ne’e ba oin.

Vise Primeiru Ministru mos hatutan-tan katak to’o ohin loron Timor-Leste iha relasaun ne’ebe di’ak ho nasaun barak iha mundu, hodi nune’e, ho esforsu tomak ne’ebe estadu halo, hamutuk ho apoiu no kolaborasaun ne’ebe di’ak hosi nasaun amigos barak, Timor-Leste optimista nafatin hodi rezolve kualker problema ne’ebe mosu iha ninia prosesu dezenvolvimentu.

Alende hasoru malu ho Primeiru Ministru interino, embaixador Singh ne’ebe oras ne’e dadaun rezidi iha Jakarta ne’e mos hala’o sorumutu ho membrus governu balun, inklui mos ONG lokal balun.