Radio, online – Durante oras tolu (3), nia laran hahu tuku 16:00 otl to’o 19:00, Comisaun Anti Corupsaun (CAC) halao investigasaun ba Ministra Finansas, Emilia Pires konaba kazu ne’ebe nia involve.

Prezensa Ministra Emilia iha CAC Kinta, (14/11) ho kareta privadu ho merk Toyota Rava ho nomor matrikula 20:315.

Depois oras tolu nia laran, Ministra Emilia sai mai lori kedan karta ida hakerek nanis ona hodi lee sai ba jornalista dehan, hanesan Ministra Finansas nomos sidadaun Timor oan, Emilia Pires dehan tenki kolabora ho justisa.

“Ita hotu hatene, artigu 14 lei CAC nian hateten katak, CAC nia aktividades hotu-hotu tenki sujestu ba segredu justisa. Portantu ida ne’e hakarak hatete katak, hau labele koalia sai ba publiku, no agradese ba jornalista sira labele halo perguntas. Tanba lei la fo dalan ba hau koalia, mesmu ke hau laiha buat ida atu subar,”Emilia deklara.

Ministra Finansa ba periodu dala II ne’e hatutan, “Ita hotu tenki respeita segredu de justisa, embora felizmente laos ema hotu mak respeita segredu de justisa. Ne’e krimi ida. Nomos bele prejudika servisu ne’ebe instituisoens sira ne’e halo. Nomos bele estraga ema inosente sira nia onra no halo foer sira nia naran”.

Ministra Emilia dehan, sidadaun Timor oan, iha dever atu kolabora ho justisa no hau mos iha intereses katak, ita hotu respeita leis ne’ebe vigora iha ita nia nasaun nia laran. Hodi nune’e ita hotu bele kontinua lao ba dalan dezenvolvimentu. Ita hotu iha obrigasaun atu kolabora ho autoridades judisiares hodi sir abele halao sira nia kna’ar.

Maibe importante tebtebes ba autoridades sira nomos sidadaun hothotu, tenki respeita leis nasaun ida ne’e nian. Tenki halao sira nia servisu ho imparsialidade durante prosesu ne’e tomak. Ho ida ne’e mak ita bele fo respeitu ba direitus Konstitusionais sidadaun Timor oan hothotu ninian.

Wainhira ida ne’e la akontese ita hotu bele sai prezudikadu, nomos sei bele halo fraku liutan, ita nia valores demokratikus no prinsipius fundamentais estadu de direitu.

Ne’ebe agora dadaun ita hotu esforsu maka’as atu hametin. Hau sempre pronto laos deit agora, maibe tempu uluk mos atu kolabora ho justisa iha asuntu oioin. Nudar Ministra no nudar sidadaun. Hau hein katak, hau bele kolabora iha ambiente ne’ebe imparsial, justu no respieta direitus fundamentais sidadaun Timor oan hotu ninian.

“Hau la bele simu perguntas ona, tanba hau deklara sai tiha ona katak, lei CAC mak bandu hau atu koalia sai ba publiku tanba asuntu segredu justisa,”dehan Emilia hodi lao dadaun.