Radio, online - Komandante Polisia Nasional Timor-Leste (PNTL), skuadra Distritu Viqueque, Supertintendente Justinho Menezes simu orientasaun husi Komando sei la autoriza grupo massa CPD-RDTL uza farda illegal tama ba Kraras hodi partisipa selebrasaun,38 Aniversariu Independensia, no hanoin hikas tinan 30 ba levantamentu no masakre suku Bibileo/Kraras, Distritu Viqueque.
CPD-RDTL husi ne’ebe deit mak uza farda illegal ami sei la fó tama ba konsentrasaun iha Kraras. Tanba tinan-tinan ita nia maluk husi CPD-RDTl mak uza farda. Mais ami avizu sira nia lideransa mós fó hatene tiha ona katak, sira tenke kompri orientasaun no regras,”dehan Supertintendente Justinho ba jornalista Tersa, (26/11).
Tuir Komandante skuadra Viqueque ne’e, seguransa durante loron lima hahú husi loron husi loron 25 to’o 29. Garante ba seguransa katak, sei la akontese problema.
“Ami avizu ba komunidade sira katak, animal tenke sulan para labele estraga ema nia sasan no mós labele fa’an tua. Bele fa’an mais ida hemu ne’e mós tenke kuidadu-an,”informa Komandante Justinho.
PNTL husi Nasional no mós Unidades espesial sira hamutuk 652 apoiu mós parseiru husi F-FDTL, hamutuk halo parseiru ba seguransa hotu. PNTL Distritu Viqueque rasik hamutuk 139 mak fó total ba seguransa.
Halo seguransa ba eventu ida ne’e hamutuk 500 ne’e la sura sira ne’ebé mak halo parada. Propriu ba hala’o ba seguransa, PNTL ne’ebé mak desloka liu-liu ba responsabilidade ba interna iha laran, ne’e apoiu husi Polisia Militar sira. Ne’e kontrolu mobimentu ema no transporte ida ne’e iha hotu kedas.
F-FDTL monta pelataun rua iha foho-foho ne’ebe haleu Kraras, ida ne’e sei garante sei la akontese problemas.
“Ami fahe monta postu tolu. Primeiru mak portaun ita boot sira tama mai ne’e. Halo vistu no pasarevista, ba transporte no movimentu ema halo deskonfia”informa Justinho.
PNTL ho F-FDTL halo koordena hamutuk ho komisaun, entre seguransa sivil, Bombeirus, Saúde no departementu sira selu-seluk. Hodi bele atende nesesidade ba komunidade ne’ebé mak presiza liu.
Tama ba selebrasaun iha dia 28 de Novembru sei halo pasarebista makas liu tan. Kareta sei la halo movimentu arbiru no ema la’o tuir regras.
Ikus liu, Komandante Viquque ne’e dehasn, grupo bonha mean husi husi Laga ne’e mai mós sei la fó tama. Sei halo intervensaun masimu.
“Ami hasai tiha farda sira ne’e hotu, depois mak ami sei komunika ba bo’ot sira no politika nain sira. Tanba ne’e desizaun sira mak hatun, kualker sidadaun ida labele uza farda ne’e,”Justinho esplika.