Prezidenti Lu-Olo Kontenti Selebra Loron Internasional Direitu Labarik

Dili-Radio Liberdade Dili Online: Prezidenti Repúblika, Francisco Guiterres Lu-Olo, ho Primeira Dama, Cidália Guiteres, sai hanesan uma na’in hodi komemora loron internasional direitu labarik ninia iha Timor-Leste.

Xefi Estadu hateten senti kontenti selebra loron ne’e ho labarik sira ne’ebe mai husi kapitál Dili inklui reprezentante estudante sira ne’ebe mai husi munísipiu balun tamba sira mak hanesan future ba nasaun.

‘‘Odamatan Palasiu Prezidenti Aitarak laran loke ba labarik sira tamba sira mak hanesan futuru ba nasaun’’ dehan xefi estadu iha komemorasaun loron internasional direitu labarik ne’ebe hala’o kinta 01/06/17 iha Palasiu Prezidenti Aitarak Laran.

Xefi Estadu mos husu ba inan aman atu hahu investe osan ba sira nia oan nia futuru liu husi programa poupansa ne’ebe Banku Central Timor-Leste inisía iha tinan 2014.

Iha selebrasaun ne’e halo lansamentu planu asaun nasionál ba labarik sira ho nune’e Komisária Direitu ba Labarik, Maria Barreto, iha nia dirkursu hateten planu asaun ne’e importante tebes ba labarik sira nia futuru.

Primeiru Ministru, Rui Maria de Araújo, ne’be mos marka prezensa iha komemorasaun ne’e apelu ba sidadaun hotu-hotu atu tau atensaun ba labarik sira nia direitu.

‘’hau apelu ba ita hotu investimentu ba labarik mai husi ita hotu, ema hotu iha responsabilidade hodi iha responsabilidade ba labarik sira atu moris iha ambiente ne’ebe saudável, goja sira nia direitu ba saúde, nutrisaun no edukasaun, livre espresaun laiha violénsia no diskriminasaun hasoru labarik sira’’ tenik Xefi Guvernu

Iha komemorasaun ne’e labarik sira halo mos apezentasaun hanesan diskursu konaba poupansa, dansa, kanta no seluk tan.

Além ida ne’e Xefi Estadu mos  fahe ai-oan ho postal ba labarik nain ruanolu resin-lima ne’ebe sai Manan nain ba kompetisaun dezeñu.