Radio, online - Estrutura Timor-Leste Press Club (TLPC), Tersa foin liu ba (2/5) kalan simu posse no halo juramentu husi Padre Parokia Santo Antonio Balibo Andreas Nahak. Tomada de posse ne’e halao iha benteng Balibo.
Estrutura TLPC ne’ebe hetan posee mak hanesan, Prezidenti TLPC Jose Belo, Armandinha Moniz (Vice Prezidenti II), Jose Sarito (Sekjen), Jose Gabriel (Adjuntu Sekjen). Vice Prezidenti I, Antonio Diaz la marka prezensa tamba halao viazen ba estranjeiru. Estrutura ne’e ba periodu 2012-2016. Tema ba posse “Pozisaun jornalista iha kontruksaun Timo-Leste”.
Partisipasaun iha serimonia ne’e prezensa husi Sekertariu Estadu Komunikasaun Sosial (SEKOMS), Nelio Isaac, Sekertariu Estadu Seguransa (SES), Francisco Guterres, Sekertariu Estadu Politika Formasaun Profesional Empregu (SEPFOPE), Ilidio da Costa Ximenes, Administrador Sub-Distritu Balibo Paulo de Jesus nomos komunidade Balibo sira. Antes ne’e mos hasai filmazen Balibo Five nian hodi anima komunidade sira.
Iha refrelasaun, Amo Parokia Santo Antonio Balibo, Andreas Nahak dehan, vida jornalista hanesan mos vida vokasional ne’ebe ninia servisu buka lia los no justisa ba ema hotu. Amo ne’e orlgulhu ba jornalista Timor oan iha tinan ne’e buka dalan hodi tau loron 16 de Outobru atu sai loron nasional ba jornalista Timor oan hotu.
“Ami fiar katak, laiha jornalista mundu ne’e nakukun. Ho knar jornalista mak ita akompanha desizaun politika no akontese saida mak mosu iha mundu ne’e,”dehan Amo Parokia Balibo.
Depois tomada de posse Prezidenti TLPC, Jose Belo dehan, hanesan lideransa foun ba TLPC iha tinan 4 nia laran sei esforsu buka hadia kualidade jornalista no defende direitu jornalista sira nian hodi servi ba dezenvolvimentu nasaun ne’e nian.
Prezidenti TLPC ne’e husu ba governu liu husi SEKOMS atu bele konsedera loron 16 de Outobru hanesan loron nasional ba jornalista Timor oan sira nian.
“Ami husu ba governu no estadu tomak atu konsedera loron 16 de Outobru sai loron nasional ba jornalista nian, maske jornalista nain 5 nee husi Australia maibe sira halao knar jornalista hodi buka los los no justisa. Ida ne’e mak jornalista Timor oan sira buka nafatin iha ukun-an ne’e,”dehan Apela Jose Belo.
Iha fatin hanesan, Administrador Sub-Distrito Balibo, Paulo de Jesus husu ba jornalista Timor oan hotu atu iha ideias hodi hari monumentu ba jornalista nain 5 mak mate iha Balibo.
“Hau kontentu jornalista Timor oan ba buka nia maluk jornalista sira ne’ebe mate hodi buka los los no justisa,’dehan Paulo.
