Radio, online – Lisboa, Ministru Negosios Estrangeiros no Cooperasaun Timor Leste, Jose Luis Guterres ‘Lugu’, halao visita ofisial iha Lisboa, Portugal iha Tersa (15-05-2013), hodi hametin liu tan kooperasaun bilateral entre nasaun rua (Timor Leste-Portugal) iha agora no ba futuru.
Informasaun ne’e www.radioliberdadedili.com simu husi media officer MNEC, Joao da Silva Guterres liu husi via email.
Visita Ministru Jose Luis Guterres, nudar primeiru visita ofisial Ministru Negosios Estrangeiros no Cooperasaun Timor Leste ba Portugal, hafoin formasaun V Governu konstitusional iha Agostu 2012.
“Iha hau nia visita ne’e, sei hasoru malu ho Presidenti Republika Portugal,Ministru Negosios Estrangeiros no Cooperasaun Portugal no inklui setor privado sira, hodi koalia konaba desenvolvimentu Timor Leste nian iha area, ekonomia, sosio-kultura, politika, defesa no seguransa,”afirma Ministru Jose Luis Guterres hafoin to’o iha Portugal.
Iha Lisboa Portugal, Ministru Jose Luis Guterres sei halao visita kortezia ba Presidenti Republika Portugal, Professor Doutor Anival Cavaco Silva, sei halao mos inkontru ho Presidenti Assembliea Portugal nian, Assunção Esteves, inkontru ho Ministru Negosios Estrangeiros no Cooperasaun, Dr.Paulo Portas, inkontru ho embaixadores CPLP tomak iha Portugal, no mos sei halao inkontru ho setor publiku no setor privadu Portugal nian.
Visita ofisial Ministru Jose Luis Guterres iha Portugal hahu iha Tersa (15-05-2013) no remata visita iha Sabado (18-05-2013), hodi fila hikas ba Timor Leste.
Foto iha leten, Ministru Negosios Estrangeiros no Cooperasaun, Jose Luis Guterres entrega hela tais ba Timor ba Presidenti Banco Espirito Santo Portugal, Ricardo Salgado, iha Av. Da Liberdade, Lisboa Portugal, Tersa (15-05-2013), hafoin hafoin hasoru malu. ***
