Ohin, La Sama opera klep fuan

Radio online, fonte Independente – Kondisaun saude Vise PM, Fernando La Sama de Araujo tama iha segundu operasaun ba klep fuan. Vise PM La Sama halao tratamentu operasaun fuan ne’e iha Hospital Mount Alizabeth, Singapura.

Xefi Gabinete Vise PM, Marcelino Magno informa katak, operasaun ikus ida ne’e ho nia objetivu hodi hadia fila-fali valvula ka klep fuan nian, ne’ebe la funsiona ho diak.

Iha semana kotuk, Dotor espesialista sira konsege hasai be’e husi pulmaun. Depois operasaun ida ne’e, La Sama ninia kondisaun konsege diak fali, bele dada is ho diak no lao avontade.

“Agradese ba Maromak bele fo fila fali hau nia kondisaun diak. Agradese mos ba povu Timor-Leste, Amo Bispo sira, Prezidenti da Republika no Deputadu sira. La haluha mos agradese tebes ba media no jornalista tomak ne’ebe esklarese ba publiku kona-ba hau nai saude real no hamate lia falsu ne’ebe dehan hau mate ona,”dehan La Sama ne’ebe haktuir husi Marcelino.

Vise PM La Sama hahu halao tratamentu saude iha Hospital Nasional Guido Valadares iha dia 30 de Maiu 2013. Hafoin halao tratamentu loron rua, mediku sira halo rujukan hodi halao tramentu iha ospital Royal-Bali, Indonezia.

Hafoin semana rua iha ospital Royal, Dotor Royal halo ruzukan hodi dezloka ba Singapura iha Ospital Mount Alizabeth, hodi halao tratamentu no prosesu operasaun to’o ate agora. ***