Estudantes husu remodelasaun lalais tanba governante balun la iha kapasidade

Radio, online - Estudantes Universitariu sira konkorda ho deklarasaun Primeiro Ministru, Kay Rala Xanana Gusmao atu halo remodelasaun iha kintu Governu Konstitusional, tamba dezenvolvimentu la iha mudansa durante ne’e.

Seitor sira ne’ebe maka la iha mudansa maka seitor Saude, Edukasaun, Infra-Estrutura inklui mos seitor  Seguransa tamba governante sira la iha kapasidade.

Estudante husi Universidade Nasional Timor Lorosa’e Efrem de Jesus Trinquedos hateten, atu halo remodelasaun ba Kintu Governu Konstitusional ne’ebe ho estrutura bo’ot ne’e depende ba Primeiro Ministro wainhira observa servisu iha governasaun la lao ho diak.

 “Koalia kona ba remodelasaun, ne’e kompetensia husi Primeiro Ministro, bele mos hetan kritika husi Prezidenti Republika, enkuantu prekupa ho estrutura Governu ne’ebe bo’ot,"haktuir Efrem de Jesus semana foin lalais ne’e iha kampus UNTL.

Nia hateten, Bloku Koligasaun iha Parlamentu Nasional hanesan Bancada CNRT, PD, no Frenti-Mudansa mos bele halo desijaun hodi desidi atu halo remodelasaun ba membrus Governu ne’ebe la iha kapasidade atu Governa Ministerio.

Ate agora Ministerio Edukasaun seidauk hatudu nia rejultadu Pozitivu, tamba kondisaun eskola seidauk rejolve inklui Programa Merenda Eskolar ne’ebe sei sai problema Seitor Seguransa  maka professionalismu PNTL nian ne’ebe sei limitadu tamba atuasaun membrus PNTL iha terrenu, inklui seitor Agrikultura ba iha produsaun agrikola ne’ebe la iha mudansa, hateten Efrem.

Iha parte seluk, Prezidenti Partido Timorense Demokratiku (PTD) Aliansa da Conseisaun Araujo katak, Primeiro Ministro tenki hamenus makina Governu ne’ebe bo’ot, tamba la fo importansia ba Povo no Estado nia interesse. Ho makina Governu ne’ebe bo’ot fo impaktu ba Orsamentu Geral Estado ne’ebe Parlamentu Nasional aprova kada tinan.