Radio online, fonte STL – Prezidenti Komisaun Funsaun Publiku, Liborio Pereira, hateten la iha lei ida atu oan troka ba ninia aman ou inan iha nia fatin servivu wainhira aman-inan husi ida mate nomos reformadu.
“Ita laiha politika ida ne’e, laiha politika ba oan atu troka aman ou inan iha nia fatin servisu wainhira mate. Laiha tanba ita adopta sistema ida ne’ebe kuandu tama ba funsionariu publiku ne’e liu husi sistema konkursu ou rekrutamentu,”hatete Liborio ba STL foin lalais ne’e.
Liborio mos hatutan, agora dadaun prosesu rekrutamentu ba funsionariu sira lao dadaun ona atu nune’e bele troka fali funsionariu sira ne’ebe hetan reformadu ou pensiun.
Iha fatin hanesan Vise Primeiru Ministru, Fernando La Sama de Araujo, liu husi diskursu hateten, lei hakerek nanis ona ba funsionariu sira ne’ebe mak tinan 60 tenki deskansa ina atu nune’ fo tempu ba jerasaun foun sira hodi halao servisu ba dezenvolvimentu nasaun.
Razaun lei fo reformadau ba funsionariu sira mak idade 60 ona, tanba iha idade ne’e, ita ema sai ferik no katuas ona. Forsa laiha ona, nasaun ne’e lao ba oin nafatin ne’e duni tenki reforma. Reforma ne’e laos deit buat foun no laos ba nasaun TL, maibe ne’e kuaze nasaun iha mundu tomak.
Iha okaziaun ne’e La Sama husu ba Funsionariu Publiku ne’ebe mak sei ativu atu nafatin no kontinua servisu ho diak hodia nasaun ne’e, tanba ne’e tenki haka’as-an no badinas. Tinan-tinan Funsaun Publiku halo rekrutamentu hodi taka fatin ne’ebe mamuk, tanba iha tinan-tinan mos halo reforma.
