Olandina Husu Feto Partisipa Maximu Iha PEDN

Radio, online – Konsuladu Timor Leste iha Bali, Olandia Caero enkoraza maluk feto sira atu aktivu maximu wainhira implementa Planu Estrategiku Dezenvolvimentu Nasional  (PEDN) ne’ebe trasa husi Primeiru Ministru Kay Rala Xanana Gusmao ba dezenvolvimentu nasional iha 2030.

Tuir Olandina, iha futuru realiza mehi ne’ebe feto hakarak, komesa agora feto  tenki bo’ok an. Kompete ho mane laos husu deit ba estado.

Olandina Caero, kasu lia hirak ne’e iha Salaun Canossa Becora Kinta(15/7/), wainhira partisipa seminar nasional konaba partisipasaun feto iha vida politika.

Olandino hatutan, ita feto mos tenki hatudu ho realidade ba mane katak feto mos bele, laos husu no hein deit.

Tempu to’o ona fefo  hatudu hodi partisipa ka involve an iha Planu Estrategiku Dezenvolvimentu Nasional ne’e nia laran  tanba feto mos parte ida iha povo Timor Leste nian.

“Timor oan sidauk bele lao mesak, sei presiza tulun husi nasaun seluk. Maibe labele fo fatin ba ema estranjeiru lao uluk ka lao iha oin. Ita tenki esforsu an atu lao uluk iha oin, labele lao tuir deit ema husik kotuk,”Sadik Olandina

Ba futuru programa PEDN realiza presiza hadia  jestaun  iha servisu laran hodi partisipa iha prosesu implementasaun PEDN no labele husik  ema husi nasaun seluk atu kaer hotu projectu  iha rai laran.

Iha fatin hanesan Sekretariu Estado Promosaun Igualdade (SEPI), Idelta Maria Rodrigues  dehan, PEDN ne’ebe aprova iha Parlamento Nasional sei fo  benefisiu ba feto iha teritoriu tomak atu bele asesu ba kualker servisu.

“SEPI  rasik trasa  ona planu ne’ebe atu implementa iha kurtu mediu no longu prazu. Planu hirak ne’e sei atende liu ba feto nia moris,”Idelta esklarese.

Idelta husu, kuandu implementasaun PEDN, importante liu ba feto sira mak tenki livre husi Violensia. Partisipa ativamente iha prosesu dezenvolvimento nasional atu feto labele sai vitima  ba prosesu dezenvolvimento.