Radio online, fonte TP – Konselhu Nasional Juventude Timor-Leste (CNJT), konsedera planu militar obrigatoriu ba juventude Timorenses laos alternativu atu hadia edukasaun iha rai laran. Tanba ne’e CNJTL husu diak liu planu ne’e integra iha Ministeriu da Edukasaun.
“Hau atu halo seminariu ida para atu konfronta ho Julio Tomas Pinto no Kaza Sivil iha Gabinete Prezidensial. Tanba ne’e hau buka hela dadus husi Singapura no Korea do Sul kona-ba sistema militar obrigatoriu,”dehan Prezidenti CNJTL, Leovegildo Hornai ba Timor Post iha JL Vila Fatuhada, hafoin partisipa diskusaun kona-ba programa no planu implementasaun kodigu konduta ba membru sira, Kinta (25/7).
Nia hatutan, see Ministeriu Defeza liu husi Sekertariu Estadu Defeza hanoin hakarak kria militar obrigatoriu iha nasaun ne’e ba juventude sira, nusa la implementa deit programa ne’e iha eskola sira.
“Hau hanoin, planu ne’e laos solusaun. Se ita halo militar obrigatoriu. Kuandu ita konta ba rasio finansial, diak liu ita tau deit ba programa edukasaun nian, para nune’e bele implementa mos sistema formatura ne’ebe membru militar sira mak fo, ida ne’e sistema ida diak tebes,”Nia hatutan.
Tuir nia, militar obrigatoriu ne’e dala ida atu ba forma deit ema nia karakteristiku, atu halo ema nia mental forte, bele iha vizaun patriotismu no nasionalismu no halo ema sai badinas iha nia moris ba futuru.
“Tanba sa, la investe deit iha edukasaun, mobiliza forsa ba eskola sira hotu halo formatura liu husi aktividades extra-kurikuler. Hau fiar katak, programa ne’e implementa iha eskola, mehi nebe SED sei sai realidade iha futuru,’dehan Leo.
