Radio, online – Sosiedade Sivil, Luta Hamutuk (LH) analiza aktividades Prezidenti Republika (PR), Taur Matan Ruak durante ne’e tama sai aldeia, suku, sub-distritu no Distritu hodi hare direitamente povu nia moris hodi hanorin no eduka governante sira atu labele tur deit iha fatin, maibe ba buka povu nia terus no susar hodi resolve tuir programa ne’ebe planea ona.
“Ami hare ita nia Prezidenti Republika hanori no eduka hela ita nia governante iha V governu konstitusional atu resolve povu nia susar no terus, tanba governu mak ezekutor,”dehan Diretor Ezekutivu LH, Mericio Akara liu husi konferensia imprensa foin lalais ne’e, iha Dili.
Diretor ne’e hatutan, karakter PR Taur tama aldeia sai aldeia indereita hanorin ona esekutor atu halo servisu ho diak labele sente hanesan liu rai, ne’ebe lor-loron mos hela deit.
“Ita nia Primeiru Ministru loron boot mak foin tau kazaku ho gravata, mais ita hare Ministru sira kazaku no gravata tau hela deit, maibe servisu la los,” Mericio kestiona.
Ministru sira nu’udar exekutor, tanba-ne’e tenki besik liu povo, hela iha komunidade nia le’et. Se ministru sira la ba besik povu diak liu fo osan ne’e ba Prezidenti Republika mak ezekuta.
Iha okaziaun ne’e LH mos ejiji ba Primeiru Ministru, Kay Rala Xanana Gusmao atu kontrola ho rigorozu ba ninia ministru sira, sekretario do estado no diretor sira hodi halo servisu maka’as ho disiplina liu tan, hodi nune’e povo bele senti duni dezenvolvimentu.
