Marie Stopes fo atendementu saude gratuita ba komunidade Dare

Radio, online - Loron Kinta 29 de Agostu, organizasaun Marie Stopes International Timor-Leste servisu hamutuk ho Centru saúde Bairo-pite nian  hodi fo atendementu geral ne’ebe gratuita iha Sucu Dare hanesan kontribusaun ba loron konsulta popular.

“Ami husi Marie Stopes hakarak fó valór no tane aas istória luta ba ukun rasik aan hanesan riku soin nebe povu timor nee nian no presiza duni tane ho didiak istória hirak nee iha tempu independénsia nia laran,” dehan Fernanda Serra, co-ordinator Klinika Marie Stopes.

Informasaun ne’e www.radioliberdade asesu liu via-email. Atendementu geral inklui planeamentu familia, immunizasaun, atendementu saude geral, no inan isin rua, no atendementu ba inan no bebe foin partus ba ema nain 180.

Fulan Agustu loron 30 tinan 1999 marka istória ida ba povu tomak hodi deside destinu Timór-Leste nian ba liberdade ka ukun rasik a ‘an liu husi konsulta popupular ho nune povu Timor-Leste bele sai husi susar no mukit nebe durante tinan barak povu nee sofre.

“Ne’e kontribusaun husi Marie Stopes ba loron importante ne’e tamba iha nasaun independente povu hotu-hotu bele assessu ba saude, importante loos,” dehan Senyora Fernanda.

Iha komunikadu emprensa ne'’e dehan, Marie Stopes esforso atu bele garantia asesu saúde, informasaun no edukasaun ba ita nia komunidade sira iha area remotas, honune ita nia komunidade sira bele iha informasaun no atendementu ba saúde nebe adekuadu no tuir duni sira nia nesesidade ho ajuda husi Ausaid.

Marie Stopes International Timor-Leste iha klínika ida iha Dili no servisu ba distritu 8 iha Timor-Leste. Ho servisu badinas no dedikadu tebes ekipa sira konsege fo tendementu no tratamentu ba ema nain 149,577 husi feto no mane no atendementu nebe halao iha district no konsege fo ona informasaun no edukasaun ba ema 261,631  konaba saúde seksuál no saude reproduktiva durante tinan 2007 to’o 2013.

Tinan 2013, Marie stopes International nia ekipa mos fo atendementu planeamentu familiár ba feto no mane hamutuk 18,355 atu nune sira bele iha planu nebe diak ba espasu oan hodi nune sira bele deside bainhira mak iha oan no oan hira.

Ita nia ekipa mos fo atendementu ba moras hadaet husi relasaun seksuál (MHRS) ba ema hamutuk 578. Marie Stopes servisu hamutuk Ministerio de Saude fo atendementu planeamentu familia, no saude inan isin rua, iha distritu Dili, Baucau, Viqueque, Lautem, Ermera, Ainaro, Bobonaro, Manufahi.