SEPI husu igreija sirkular ba sarani konaba loron nasional feto

Radio, online – Sekertaria Estadu Promosaun Igualdade (SEPI), Idelta Maria Rodrigues hasoru malu ho Amo Bispo Diosece Dili, Dom Alberto Ricardo hodi husu apoiu igreija hasai karta sirkular ba sarani liu husi parokia atu sarani hotu partisipa selebrasaun loron feto nasional.

Ekontru ne’e halao iha episcopal Diosece Dili, Kuarta (2/9), Lecidere, Dili. Loron Nasional Feto monu iha dia 3 de Novembru, maibe aktividades sei muda ba dia 8 de Novembru tinan ne’e. Razaun muda ba dia 8 de Novembru tanba iha dia 2 Novembru loron matebian (finadu).

Depois enkontru SEPI Idelta dehan, objetivu enkontru ho Amo Bispo Diosece Dili, atu update konaba selebrasaun loron Nasional feto, hasoru malu ho lider Katholika ne’e atu oinsa igreija nia hanoin konaba loron nasional ne’e.

SEPI husu Amo Bispo atu lidera misa ba iha dia 4 de Novembru. Nomos Amo Bispo sei hasai sirkular ba parokia hothotu atu hasai mensajem uitoan konaba dezenvolvimentu feto.

“Amo Bispo sente kontente ho inisiativa ida ne’e, igreija sei kontribui nafatin. pontu de vista Amo Bispo foti konaba tema ne’ebe SEPI trasa iha tinan ne’e “Hatete Lae ba Violensia Domestika Mai Ita Servisu Hamutuk ba Dezenvolvimentu Nasional”. Idelta informa.

Tuir SEPI, igreija nafatin fo kontribuisaun, tanba igreija nia papel importante atu prepara feto nia mane wainhira atu ba kaben hodi forma uma kain ne’ebe harmonia.

‘Hau hanoin katak, igreija besik liu komunidade nomos ba familia sira, igreija komprende muinto bem konaba feto moris iha familia,”dehan Idelta.

Ba loron nasional feto, SEPI iha aktividades mak hanesan; iha dia 4 de Novembru misa boot iha igreija Katedral, Vila-verde, depois misa ba kari aifunan iha Semiteriu da Herois iha Metinaru.

Tuir orariu ba selebrasaun loron feto ne’e sei iha aktividades feira ba produtu lokal servisu hamutuk interministerial. Depois iha dia 7 de Novembru sei iha konsertu muzika iha Palacio do governu  artista husi Indonezia banda muzika KOTAK no artista Timor oan.  Iha dia 8 de Novembru halao komemorasaun ba loron feto.