Radio online, fonte Timor Post – Lei imprensa ne’ebe mak V governu aprezenta ona iha Parlamentu Nasional (PN) defini mos kona-ba se mak jornalista, no lei ne’e rasik taka dalan ba media partido atu deklara-an nudar jornalista.
“See nia servisu ba jornal ida ne’ebe laos ba publiku inklui mos radio no televizaun partido nian, ne’e la tama iha kriteria jornalista ba publiku,”hatete II Vice PN, Aderito Hugo da Costa iha ninia servisu fatin Kinta, (10/10).
Ne’eduni Aderito haktuir, ita tenki halo definiasaun ida klaru. Hakarak ka ou lakoi tenki halo duni. Tanba naran ida jornalista ne’e servisu ida profesional no regula ho kode etiku.
Jornalista tenki ema ne’ebe, servisu iha ajensia halo publikasan. Tanba ne’e mak ita presiza halo lei ne’e para bele regula. See lae mosu jornalista sira ne’ebe mak falsifika ninia titulu hodi asesu ba informasaun.
II Vice PN ne’e hatutan, PN mos simu ona lei 3, ne’ebe iha ona pareser tekniku nia liman no tempu badak prezidenti sei haruka ba Komisaun A. Lei 3 ne’e mak hanesan; lei komunikasaun sosial, lei ben-ji moves no lei teras propriedades.
“Ami komuika ona ho komisaun A, atu oinsa bele elabora sira nia kalendariu, hodi halo diskusaun ba lei 3 ne’e,’dehan eis diretor jornal Timor Post ne’e.
Liu husi Adrito, Prezidenti PN Vicente Guterres rasik promete ona semana oin proposta lei 3 ne’e baixa ona ba iha Komisaun A hodi halo preparasaun.
Hanesan mos eis jornalista dehan, Lei Komunikasaun Sosial importante tebes ba media iha TL. Tanba depois TL ukun-an media moris buras tebes no sei uza lei Indonenzia nian no lei UNTAET nian.
“Ita aprova lei nee lalais hodi hari ona mos Konselhu da imprensa atu hare konaba problemas media no jornalista sira infrenta,”Adeito esplika.
Iha sorin seluk, Sekertariu Estadu Komunikasaun Sosial (SEKOMS), Nelio Isaac Sarmento dehan, nia rasik koalia ona ho Prezidenti PN atu tau importansia ba lei refere.
Ne’e duni PN sei halo diskusaun lei ne’e iha semana oin. “Ita tenki kalma hodi hein PN halao sira nia servisu,”dehan Nelio.
