Prezidenti GMPTL husu ba feto Timor labele matan naklosu ba osan

Radio, online – Liu husi komemorasaun loron feto rural Kinta ne’ebe sei realiza iha dia  (15/10), Prezidente Grupu Mulher Parlamentares Timor-Leste (GMPTL), Josefa Alvares Pereira husu ba feto Timor oan hotu atu labele matan naklosu ba osan. Tanba osan sei halo feto barak mk terus.

Prezidenti GMPTL ne’e hato’o ninia palestra iha iha Sub-Distrito Fatuberlihu, Distrito Manufahi, Kinta (10/10).

“Ekonomia labele tau iha dignidade feto ida. Ne’e signifika katak feto oan sira labele matan osan hodi hare mane sira,  mane osan barak entaun monu ba sira. Tanba wainhira feto ida osan laiha nia monu lalais ba mane iha osan.  Osan ne’e ita sei bele hetan loron ida, maibe se feto ida lakon nia dignidade, ne’e lakon para sempre to’o tinan ba tinan, oan ba oan, bei oan ba bei oan, gerasaun ba gerasaun,” dehan pereira.

Iha oportunidade ida ne’e, presidente GMPTL husu mos ba autoridade lokal mane sira atu dignifika nia parseiro, hodi hatudu ba ema seluk hanesan ezemplo atu banati tuir.

“Nudar autoridade lokal labele sente katak nia ema boot, entaun servisu todan sira fen mak tenke lori. Fen mak tenke halo servisu feto nian no mane nian hotu .

Exemplu nudar fen tenke hare labarik, kuru be, ba to’os- natar, tutur ai, maneja familia laran, la’en baku tan fen no sei barak tan. At liu fali konsidera fen hanesan la’en nia atan. Ne’e lae, labele,” dehan presidente GMPTL ho lian maka’as.

Ambiente dialogu ne’e sai manas no dinamiku tebes wainhira loke sesaun perguntas ba partisipantes sira, liliu profesores, joven estudantes sira, autoridade lokais no inan aman sira, tanba hamosu diferensias ideas ne’ebe sempre provoka no resulta solusaun pozitivos husi deputada parlamentu nasional . 

Orador nain hat iha komemorasaun ne’e mak presidente GMPTL Josefa Alvares Pereira , deputada Maria Fernanda Lay, deputada Ana da Conceicao Ribeiro no deputada Olinda Morais.

Komemmorasaun refere lolos halao iha 15 de outubro maibe adia fali kinta feira dia 10 de outubro 2013. Tema mundial husi komemorasaun ne’e mak “komitmentu hakbit feto rural hodi asegura halakon hamlaha, kiak no mukit.

Entretantu partisipantes recomenda ba deputada sira atu realiza nafatin dialogo modelu hanesan ne’e, nune’e ema tomak bele komprende hodi hamenus violasaun ba feto sira nia direito.
Dialogu ida ne’e la’o susesu to’o remata tanba hetan suporta no koperasaun diak husi UNwomen, Caucus no Parlamentu Nasioanal rasik.