Nelio husu media ativu kobertura aktividades juventude

Radio, online – Sekertariu Estadu Komunikasaun Sosial (SEKOMS), Nelio Isaac Sarmento apela ba media nasional no privadu atu fo atensaun hodi halo kobertura ba aktividades juventude iha nasaun ne’e.

Tuir Sekertairu Estadu Nelio, media barak ladun kobertura ba aktividade juventude, maibe eventus deit mak halo kobertura.

“Husu liu liu ba  RTTL-Ep,  radio privado no jornal sira hotu atu halo kobertura ba aktividade joven sira nian, iha kada komunidadade, hodi nune’e atrai joven sira seluk hodi partisipa  aktiva ,” dehan Nelio iha lansamentu livru peskiza husi Search  For  Common  Ground  (SFCG) ba distritu 6 konaba juventude minimu asesu ba informasaun (14/10).

Nelio hatutan, see media sira la kontribui ba aktividades juventude sira, susar tebes ba joven sira atu partispa ho ativamente ba prosesu dezenvolvimentu nasaun ne’e.

Eis jornalista TVTL ne’e mos rekoinese katak, atu hatene aktividade jornalista presiza tebes hare politika media iha parte redasaun. Media ladun iha interese ba joven nian no media sira ne’e ninia distribuisaun konserva iha Dili deit.

“Ita hare kapasidade profesional serbisu jornalista  privadu ho publiku  seidauk  to’o iha espetativa ne’ebe povu hakarak,”Nelio komenta.

Hare ba razaun hirak ne’e, Nelio dehan governu liu husi SEKOMS tenke fo antensaun maka’as ba rekursu  ba jornalista no media officer. Dalan ne’e hodi bele tulun halo kobertura ba akitividade joven sira nian.

Diretor  Search  For  Common  Ground (SFCG), Jose Francisco Gusmão dehan, peskiza mak halao ne’e iha distritu 6 mak hanesan Distritu Aileu Bobonaro, Buacau, Ermera Dili no Manatutu. Rejultadu peskuiza hatudu katak partisipasaun juventude iha informasaun minimu tebes.

“Radio komunidade ejiste hotu iha distritu 13, maibe sira fo informasaun la tuir komunidade  nia hakarak tanba muzika barak liu. Kapasidade jornalista radio komunidade mos minimu tebes atu halo programa diak atu atrai joven sira hodi akompaha  sira  nia programa,”esplika Jose Francisco.

Iha fatin hanesan Prezidenti Konselhu Juventude  Nasional Timor-Leste (CNJTL), Leovegildo Hornai hatete, kobertura Televizaun Timor-Leste mak tenke liga liu ba aktividade sira ne’ebe loke perspektiva joven iha are kreatividade, programa edukasaun ambiental ne’ebe relasiona ho ema nia moris.

“Hau hanoin ida ne’e mak media tenke promove, hodi partisipasaun juventude nian masimu iha infomasaun,”dehan Leo.

Iha serimonia lansamentu livru peskiza ne’e  halo iha kampos Faspol UNTL ho tema “Launch of The Report a Baseline Study youth Democracy and peace Bailding in Timor Leste”