Radio, online - Rendiementu negosiantes nian wainhira tama ba loron Finadu (loron matebian) komesa sae maka’as, iha semana ida ne’e nia laran, ema barak maka kompras sasan nesesidade baziku hodi preparasaun ba loron refere.
“Hau nia hare sasan agora folin aumenta iha semana ne’e, tanba loron finadu ne’e ema barak maka prezisa sosa sasan hodi prepara ba loron ne’e,”dehan Maria Ximenes ba ekipa treinamentu reportazen Direitus Humanus no reportazen sensivel ba konflitu iha Kaikoli, Kuarta (30/10).
Maria hatutan, sasan nesesidade bazika ne’ebe folin sae komesa iha loron Segunda semana ne’e nia laran hanesan Lilin, Ai-funan, Manu tolun, Fehuk Ropa, Ayam Potong, Bua, Malus, Tabaku Timor, Sigaru LA, Sigaru Surya no seluk- seluk tan, ne’ebe mak sempre uza iha loron ne’e, tanba loron refere tinan ida selebra dala ida.
“agora dadaun ho sasan ne’ebe mak folin sae ne’e halo ami ne’ebe mak laiha servisu, e ho osan ne’ebe ladun sufisiente susar tebes atu sosa sasan ho folin karun,” Maria informa.
Nia husu, tanba ne’e nia husu ba governo liu husi Ministerio Comercio Industria no Ambiente (MCIA) nia departementu kontrola sasan nia folin atu halo kontrola sasan folin atu nune’e vendedor sira labele hasae sasan nia folin tuir deit gostu.
Iha fatin la hanesan vendedor Jose dos Santos ne’ebe fa’an hela sasan iha mini-Merkadu Perunas dehan, sasan ne’ebe nia fa’an iha semana ne’e hetan rendimentu diak, tanba iha semana ne’e nia laran komprador barak maka sosa sasan.
“Hau fa’an sasan ne’ebe mak ki’ik, no tuir folin ne’ebe iha hanesan lilin, sigaru, manu tolun, manu timor, bua, malus, tabaku timor no , lis. Rendimentu ne’ebe hetan iha semana ne’e nia laran kada loron ida bele hetan to’o 100 dolar, tanba komprador barak maka sosa sasan,” Jose esklarese.
Jose hatutan, osan sira ne’e rai hamutuk hodi sorin ba sosa fila fali sasan ba fa’an, e sorin balu hodi sustenta familia iha uma laran, sosa oan sira nia ropa eskola, kaderno, lapizera, sapatu, pasta, han hemu, no seluk-seluk tan, nia dehan.
Partisipante treinamentu reportazen Direitus Humanus no reportazen sensivel ba konflitu
Grupo III:
1. Adelino Magalhaes Maia
2. Jose Pereira Guterres
3. Raimunda Domingas Freitas
4. Regina S. Seran das Dores
