Radio, online – Maski kompañia Woodside-Conocophilips ho join venture sira sai nafatin operador ba mina iha Timor Leste, maibé Ministru Petroleum no Rekursu Mineral, Alfredo Pires hateten katak kompañia rua ne’e seidauk selu taxa ba kuazé 3 Biloens.
Ministru Petrolum no Rekursu Mineral, Alfredo Pires hatete, kompanha Conocophilips-Woodside ne’ebe esplora mina iha Bayu Undang, seidauk selu taxa hamutuk U$ 3 bilion ba kona ba explorasaun gas no mina iha tasi Timor.
Tuir loloos, Ministru ne’e realsa, governu Timor Leste ho kompañia Conocophilips inklui empreza hirak seluk tenke selu taxa ba area JPDA 50% kada fulan maibe, tanba hamosu problema iha akordu ne’e nia laran maka mosu problema.
Kompañia ne’ebe involve iha prosesu explorasaun mina no gas iha area Bayu Undan maka hanesan Conocophilips inklui kompañia ki’ik sira seluk ne’ebé durante fulan 18 laselu taxa ba estadu Timor-Leste maske hetan lukru bo’ot husi prosesu fa’an mina ba rai liur, hateten Ministru Alfredo Pires.
Nune’e, kompañia sira komesa ke’e ona mina iha area Bayu Undan, maibe iha kontratu deklara katak, kuandu kompañia ida konsege ke’e hetan mina iha area ne’e depois nia fa’an, entaun kompañia ne’e tenke selu impostu 50% ba kofre estadu Timor-Leste, maibe ida ne’e nunka akontese. Tanba ne’e mak hodi lori ba Tribunal hodi hadia sasan sira ne’e.
Ministru Petroleu no Rekursu Minerais, Alfredo Pires hatutan, kompañia sira ne’ebe halo kazu hasoru Timor-Leste kona ba selu impostu, sira selu ona osan hamutuk miliaun 300 resin ba kofre estadu, maibe prosesu legal ba kazu hirak ne’e kontinua la’o hodi hetan nia desijaun loloos
“Too ohin loron kompañia sira ne’e selu ona impostu kuaje miliaun 300 resin, maibé kompañia rua ne’e inklui joint venture sei iha kuazé 3 Biloens maka seidauk selu, selu impostu ne’e bele to’o biliaun,” hateten Ministru Petroleu no Rekursu Minerais ba Jornalista sira, Kinta (24/010) horisehik, iha Palasiu Governu.
“Ita hare ita seidauk forte, tanba ita tenke kuidadu ho kompañia boot sira ne’e, tanba iha futuru oin mai, sira mai ho modellu kontratu ne’ebé oi-oin, maibe oras ne’e dadauk ita iha ona kapasidade balun ne’e mak ita latauk no brani lori kazu ne’e ba Tribunal internasionál,” nia hateten.
Ministru ne’e akresenta, entre kazu hirak ne’e akontese iha Primeiru Governu Konstituisional iha Governasaun FRETILIN.
Ba oin, Ministru Alfredo sujere ba kompañia internasional ne’ebé atu sai operador iha Timor-Leste tenke iha osan rasik, no labele diskonta.
