Governu aloka rihun U$100 ba selebra loron 12 Novembru

Radio online, STL – Governu liu husi Sekertariu Estadu Juventude Desportu (SEJD), aloka orsamentu rihun U$100 hodi selebra loron masakre Santa Cruz 12 de Novembru, hanesan mos loron nasional ba juventude Timor-Leste.

Sekertariu Estadu Juventude Desportu , Miguel Manetelo apela ba joven Timor oan hotu atu ididak halo refleksaun ba loron 12 Novembru.

“Ba alin sira tomak katak, ita tenki orgulhu tanba loron 12 Novembru nee ita nia loron atu ita onra no omenajen ba ita nia maluk joven sira ne’ebe husik hela ba ita iha tinan 1991, tanba loron ne’e estadu foti sai loron nasional ba juventude TL,”dehan Manetelu ba jornalista iha salaun SEJD, Lecidere-Dili, Kuarta (06/11).

Nune’e mos Prezidenti Komisaun Organizadora 12 Novembru, Nelson Tomas Correia hateten, alende selebrasaun 12 de Novembru refleta ba parte rua, premeiru konaba juventude ho nia asaun propriu nomos komemorasaun ba iha inspirasaun juventude iha pasadu. Potensia rua ne’e selebra hamutuk hanesan faze ida ne’ebe aas liu husi estadu no nasaun ida, atu hare kona pasadu iha prosesu juventude iha dinamika ba dezenvolvimentu nasional.

Iha fatin hanesan tuir, Prezidenti Conselhu Nasional Juventude Timor-Leste (CNJTL), Leovegildo Hornai dehan, tinan ida ne’e governu alok orsamentu ba loron ne’e ho nia aktividades sei too ba nivel aldeia.

“Ita hakarak halo aktividades iha nivel hothotu, liliu iha aldeia Timor laran tomak, karik ita nia kapasidade mak la to’o. Tinan- tinan aktividades to’o deit nivel sub-distritu,”dehan Leovegildo.