Radio, online - Primeiru Ministru Kay Rala Xanana Gusmão akompanha husi Ministru Negosiu Estranjeirus no Kooperasaun, Jose Luis Guterres, partisipa forum demokrasia Bali ba dala VI, iha Nusa Dua-Bali, Indonesia.
Informasaun ne’e www.radioonline asesu liu husi via-email, husi Assesor media office MNEC, Joao da Silva Guterres, husi Bali-Indonezia.
Iha Forum Demokrasia Bali ba tinan ida ne’e mai ho tema “Consolidating Democracy In Pluralistic Society’, Primeiru Ministru Kay Raka Xanana Gusmão iha nia diskursu hateten, Forum Demokrasia ne’e importante tebes, oinsa bele hametin no haburas liu tan demokrasia iha mundu.
“Liu husi Forum ida ne’e, hau husu, mai ita hotu ne’ebe iha ne’e, moris iha ambiente ne’ebe demokrasia nia laran, pas no estabilidade,”alerta PM Xanana hodi husu ba nasaun boot sira labele halo manipulasaun ba nasaun kiik sira ne’ebe iha demokrasia.
PM Xanana hateten, demokrasia iha nasaun ida iha mos nia dezafiu, Timor Leste nudar nasaun kiik, nasaun boot sira mos tau intelijensia ba nasaun kiik. Ba Timor Leste, demokrasia ne’e sai pilar ida ne’ebe importante ba povu Timor Leste hodi lao ba oin.
Iha diskursu, PM Xanana mos koalia konaba situasaun iha nasaun Guinea-Bissau ne’ebe laiha pas no estabilidade no laiha ninia Governasaun to’o ohin loron, tanba ne’e, liu husi Forum Demokrasia Bali, PM Xanana husu ba nasaun sira iha mundu atu fo nia apoiu no tulun ba Guinea-Bisau, para resolve problema ne’ebe sira hasoru durante ne’e, liu husi eleisaun ne’ebe atu halao iha Guinea-Bissau, bele lao diak no fo moris diak ba povu Guinea-Bissau.
Forum Demokrasia Bali ba dala VI, komesa iha tuku 09:30 Oras Bali, Indonesia nian, ne’ebe loke direitamente husi Presidenti Republika Indonesia Susilo Bambang Yudhoyno akompanha husi Primeiru Ministru Kay Rala Xanana Gusmão no Liurai Brunei-Darussalam, Sultan Hassanal Mu’izzaddin Waddaulah.
Forum demokrasia ne’e halao durante loron rua, hahu husi loron 07-11-2013 to’o 08-11-2013, hetan partisipasaun maximu husi nasaun barak husi mundu hanesan Ministru Negosiu Esntrajeiru Australia Julie Bishop, Ministru Negosiu Entrajeiru Azerbaijan Elmar Mammadyarov, Ministru Negosiu Entrajeiru Fiji Ratu Inoke Kuboabola, Vice Presidenti Partidu Liberal Demokratiku Jepan Masahiko Komura no sel-seluk tan.
