Radio, online - Dili, 11 Novembru 2013 – Relasiona ho dezastre anin tufaun Haiyan sesta-feira semana kotuk iha Filipinas ne’ebé hamate ona ema kuaze rihun sanulu resin, ema rihun ba rihun lakon, no infraestrutura barak destruídu. Ho ne’e, Segunda-feira ne’e Prezidente Republika Taur Matan Ruak hodi povu no Estadu Timor-Leste nia naran hato’o kondolénsias ne’ebé kle’an ba povu no Governu Filipina, liuliu ba vítimas hosi tufaun Haiyan.
Xefe Estadu deklara: “Ha’u-nia laran-triste tebes wainhira haree dezastre anin tufaun Haiyan iha Filipinas ne’ebé hamosu estragus maka’as no halakon ema rihun ba rihun nia vida. Aproveita momentu susar ida-ne’e hakarak fahe ha’u-nia sentimentu solidariedade ba vítima sira no família vítima sira-nia sofrimentu.”
Karta komunikadu da emprensa ne'e www.radioliberdadedili.com asesu liu husi via email husi Gabinete Komunikasaun Prezidensial.
Prezidente hatutan: “I aproveita mós hodi povu Timor-Leste nia naran no hodi ha’u-nia naran rasik hakarak aprezenta ha’u-nia simpatia no kondolénsias ne’ebé kle’an ba Governu Filipina, liuliu ba vítima sira no família matebian sira-ne’ebé mak sofre hosi anin tufaun Haiyan ida-ne’e.”
“Ikus, ami-nia orasaun hamutuk ho vítimas no família sira. Ha’u dezeja forsa iha tempu susar ida-ne’e no hein katak Ita-Boot sira bele ultrapasa sofrimentu ida-ne’e.”
