Fehuk ropa konteinar 5 dodok iha Porto Dili

Radio, online – Iha area parte Porto Dili ema barak mak liu iha neba sempre taka ibun, tanba dois. Dois ne’e tanba fehuk ropa konteiner 5 mak dodok iha Porto Dili nia laran,kuaze semana ida ona.

Fehuk ropa ne’e tula lori husu Surabaya mai Dili kuaze loron kleur ona. Kompanha Agrivino mak tula fehuk ropa ne’e mai. Responsabel kompanha Agrivino, Hersenio de Jesus dehan, los duni, ema barak mak liu iha area Otel Timor nia oin sempre taka ibun tanba fehuk ropa konteinar 5 mak dodok.

Tuir Hersenio dehan, fehuk ropa ne’e tula husi Surabaya, depois tau iha konteinar laran, tanba kondisaun manas mak halo fehuk ropa sira sai dodok hotu. Nune’e mos roo sira mak tranka iha Porto Dili antrian atu sobu sira nia sasan.

“Ami labele nia fehuk ropa dodok hotu ona, tanba trata dokumentus atu sobu sasan mak sai tarde. Ida ne’e fo impaktu tebes ba fehuk ropa. Agora ami hein deit husi Alfandega atu despaisu karta ida hodi ami tula fehuk ropa dodok sora ne’e ba soe. Maibe ami tristi tanba lakon ona osan barak,”dehan Hersenio.

Tuir fontes ida iha Alfandega katak, tuir lolos kompanha Agrivino tenki trata dokumentus ne’e lalais atu nune’e fehuk ropa nee la bele dodok, maibe trata tarde mak sai nune’e.

Sidadaun Maria dos Santos, lameneta tebes ba kompaha sira nia servisu Porto no Alfandega, tanba impkatu husi fehuk ropa nia dois ne’e halo ema barak mak lao iha Porto nia oin taka ibun hotu.

“Dois ne’e hanesan sintina mak nakera ou hanesan ema mak mate, dois ne’e atu los,”komenta Maria.

Maria husu ba Ministeriu kompetende atu emerjensia tula sai tiha fehuk ropa dodok ne’e ba soe tiha iha fatin dok.