Radio, online – Estudante Institute Of Business (IOB), Ermelinda da Costa ho idade 21 anos mate tara-an, Kinta, (21/11) tuku 17:35 otl. Vitima mate tara-an iha uma kost ne’ebe ninia inan ki’ik mak aluga, iha kedas IOB nia kotuk, Vitima husik hela mundu iha semester II , Fakuldade Teknika.
Tiun rasik husi vitima, Eqluides da Silva sai sasin katak, durante ne’e vitima laos hela iha kost, vitima hela ho ninia tian iha Bebonuk. Tanba vitima ninia inan ki’ik servisu iha IOB mak kost uma ne’e, foti lisensa anual lif (cuti) ba Distritu Baucau, dia 16 de Dezembru 2013 mak tama fali.
Ninia inan ki’ik hameno hela lian ba vitima katak, loron mai eskola, mai mos hare sasan sira iha uma kost ne’e.
Antes ne’e kuaze iha tuku 16:15 otl, vitima telefone ba ninia inan ki’ik iha Baucau hodi informa katak, vitima moras hela iha uma kost. Depois vitima ninia inan ki’ik telefone ba vitima ninian tiun dehan, ba iha uma kost hodi tula hela vitima ne’ebe moras hela iha kost lori hela ba uma iha Bebonuk, depois halo tratamentu.
“Ami buka iha neba laiha (IOB), ami fila mai buka tan iha haris fatin mos laiha, entaun ami rua buka ba buka iha kost. Hau haruka hau nia alin mai uluk hare iha kost maibe odamatan xave hela. Depois hau tuir mai hare iha kost ne’e hanesan ema ida laiha, maibe tanba hakarak hatene los, ami rua tuku odamatan bolu nia naran ema ida mos la hatan. Ami obriga tebe odamatan nakloke, hare ba vitima ho is laiha tara-an hela,”dehan Tiu husi vitima ho sentiment tristeza.
Vitima mate tara-an ho tali fiu mean no hakerek hela lia fuan iha surat tahan iha tara iha iha kakorok. Vitima husi Distritu Baucau vila, suku Buruma. Vitima hanesan feto mesak iha uma laran. Vitima mos ninia inan-aman laiha mate hotu ona.
Vitima durante ne’e sofre hela moras Rins. Kuandu moras rins ataka vitima aguenta la diak. Tur ho hamrik mos ladiak hotu, tanis deit, halo ami tauk hotu. Foin daduk ne’e vitima baixa iha Hospital referal Baucau.
“Hau hanoin, karik matebian hanoin badak, tanba moras ne’ebe nia infrenta. Vitima mos ninia bin rasik, ho inan-aman mate hotu ona ne’e mak hanoin badak hodi hili dalan hanesan ne’e karik. Maibe ita hein liu husi outopsia mak deskobre lolos,”dehan Eqluides.
Tiun rasik mos dehan, ita sei hare iha surat tahan ne’ebe mak vitima hakerek tara hela iha ninia kakorok ne’e. Ami mos seidauk hare hakerek saida mak iha surat tahan ne’e, ita hein investigasaun klean husi polisia.
Iha tuku 19:00 otl, polisia unidade Forensik to’o fatin akontesementu hodi lori matebian ba hospital hodi halo outopsia, atu hatene motivu vitima ninia mate.
