Radio, online – Kondutor Primeiru Ministru (PM), Kay Rala Xanana Gusmao, Acacio da Costa C. Monteiro mate mout, iha tasi Cristo Rey, Kinta, (5/12).
Matebian ema ne’ebe hoby (gosta) kail, iha oras tuku 10:00 resin otl, mesakl ho kareta marka pajero sport ho nomor polisia 03.778G ba iha fatin kail, iha Cristo Rey nia nia okos. Iha tuku 11:12 otl matebian mout iha tasi laran. Matebian nia isin mate hetan iha tuku 13:10 otl husi Unidade Polisia Maritima (UPM) kolabora ho ema Atauro nain 2.
“Hau ho hau nia laen mos mai atu kail ikan iha fatin ne’e, maibe ami nia motor sei para iha sorin neba. La kleur ami rona lian ema ida hakilar hodi bolu dehan, ajuda lai….ajuda lai…lian dala rua hanesan ne’e ami mai. Ami hare matebian ninia liman rua mak mosu deit ona, isin lolon mout tiha ona. Ne’e mak hau nia laen ba bolu maun seguransa sivil hodi mai atu ajuda, maibe mai ne’e matebian mout lakon tiha ona,”esplika sasain Filomena dos Santos.
Antonio da Silva Costa hanesan Seguransa Sivil iha Cristo Rey dehan, matebian liu husi portaun boot Cristo Rey nian ne’e iha tuku 10:00 otl. “Matebian lori kareta hanesan patrolia nian ne’e , ne’ebe hau hanoin matebian halo patrolia,mentu. Matebian ne’e mesak deit iha kareta laran. La kleur rona fali informasaun husi Filomena nia laen mai tatoli dehan, maun ida mout iha tasi laran. Ami ba ne’e matebian lakon tiha ona iha tasi laran,”Antonio informa.
Depois hare matebian lakon iha tasi laran Antonio lori ninia hand phone telefone ba polisia Distritu Dili no UPM hodi mai buka solusaun buka matebian nia isin mate. “Hau telefone ba polisia hodi mai atu foti desizaun no fim buka hetan duni iha fatin akontesementu ne’e,”dehan
Tuir Seguransa Sivil ne’e katak Unidade Polisia Maritima (UPM) to’o iha fatin akontesementu tarde uitoan ho ida ne’e mak labele salva matebian nia vida.
Simu tiha informasaun Komandante Unidade Polisia Maritima (UPM), Lino Saldanha to’o iha fatin akontesementu tuku 12:30. Komandante ne’e fo ordem ba ninia elementus nain 4 hamutuk ho Atauro nain 2 luku iha tasi laran hodi buka matebian. Iha minitu 40 resin, konsege hetan duni matebian ho kondisaun is laiha tiha ona. Matebian ninia isin sei fresku hela no ran fresku sei naksulin.
Liu husi ordem Komandante UPM, roo jonson maritime, lori matebian mai hatun iha Quartel UPM nian iha tasi ibun Sional oin.
“Ami ba laos ona salva ema nia vida, maibe mai ba buka ona mate isin. Ho ida ne’e mak hau esforsu ho elementus sira konsege buka no hetan duni mate isin,”dehan Lino Saldanha.
Iha fatin akontesementu oan mane no ferik oan matebian akompanha hodi hatene lolos kondisaun matebian. Iha tuku 13:12 otl. Hetan matebian ho kondisaun isi mate oan mane no ferik oan hakilar hodi tanis. Matebian husik hela oan nain 7, oan mane nain 2 estudu iha Bali, Indonezia.
Agora dadaun mate isin, lori ona ba Hospital Nasional Guido Valadares (HNGV) hodi halo outopsia, tanba matebian hetan kanek iha ren toos. Primeiru Ministru agora dadaun sei iha estranjeirtus, tuir informasaun bainrua mak sei too mai Timor-Leste.
