Radio, online - Ministru Negosiu Estranjeiru no Kooperasaun (MNEK), Jose Luis Guterres ‘Lugu’ halao inkontru bilateral ho Sekretariu Jeral ACP (African, Caribbean and Pacific), Alhaji Muhammad Mumuni, EEAS (European External Action Service) Managing Director for Asia and Pacific, Viorel Isticioaia-Budura no Director Geral DEVCO (Developpement et Cooperation), Fernando Frutuoso de Melo, Segunda (9-12-2013, iha Bruxela, Belgia, hodi hametin kooperasaun bilateral ho organizasaun internasional sira ne’e iha agora no ba futuru.
Iha inkontru bilateral ne’e, akompanha husi Embaixador Timor-Leste ba Bruxela, Belgia, Nelson dos Santos, Direktor Nacional Pacific, Aleixo da Silva no Adjunto National Authorizing Officer (NAO), Madalena F. M. Hanja Costa Soares.
Inkontru bilateral entre Ministru Jose Luis Guterres ba Sekretariu Jeral ACP ne’e, Ministru Jose Luis lori nasaun no povu Timor Leste nia naran fo valor ba ACP no Timor-Leste fo suporta nafatin ba ACP, tanba Timor-Leste mos pasparte ba ACP. Timor-Leste nia orsamentu baziku iha nia prosesu diskusaun lao atraza oituan, maibe ACP afirma katak, Timor-Leste sai ezemplu diak ba ACP.
Ministru Jose Luis husu ba ACP atu tau importansia ba saida maka Timor-Leste atu ajuda, Timor-Leste mos oras ne’e fo nia apoio ba nasaun Guinea Bissau, ba eleisaun ne’ebe maka Guinea Bissau atu hasoru agora.
Sekretariu Jeral ACP Alhaji Muhammad Mumuni hateten, nia parte senti kontenti tanba hetan visita husi Ministru Negosiu Estranjeiru no Kooperasaun Timor-Leste, Jose Luis Guterres iha sekretariadu ACP, hodi hametin liu tan kooperasaun bilateral entre Timor-Leste ho ACP.
ACP reafirma katak, Timor-Leste kredibel tebes, tanba ne’e ACP agradese ba Timor-Leste, ba apoio ne’ebe Timor-Leste fo ba ACP. ACP mos kontenti tanba rona Timor-Leste fo nia apoio ba nasaun Guinea Bissau.
Inkontru bilateral Ministru Jose Luis Guterres ho EEAS (European External Action Service) Managing Director for Asia and Pacific, Viorel Isticioaia-Budura, Ministru Jose Luis fo orbigado no fo respeito ba EEAS ne’ebe hare ba vizaun global, EEAS halao vizaun diak hodi fo apoio ba nasaun kiik sira.
Timor-Leste tau nia prioridade maka hanesan, Governasaun diak, kapasitasaun ba rekursu humanus, desenvolvimentu rural no seluk tan, tanba Timor-Leste nia populasaun sei iha linha pobreza, tanba ne’e maka presisa nafatin EEAS nia apoio hodi ajuda redus pobreza.
Husi parte EEAS hateten, sira kontenti simu visita husi Ministru Negosiu Estranjeiru no Kooperasaun Timor Leste, Jose luis Guterres, hodi hametin liu tan kooperasaun bilateral.
EEAS pronto nafatin atu fo apoio ba Timor-Leste, EEAS mos apresia ho desenvolvimentu Timor-Leste ne’ebe iha tinan 10 nia laran, avansadu ba oin ho pozetivu tebes.
EEAS mos agradese ba Ministru Jose Luis no povu Timor Leste nia apoio hodi simu representante EEAS ho diak iha Dili.
Iha inkontru ho EEAS hateten, EEAS fo nia apoio maximu ba Timor-Leste atu tama ba ASEAN. Ministru Jose Luis agredese ba apoio husi EEAS ba Timor-Leste nia adezaun ba ASEAN.
Entertantu hafoin hasoru malu ho EEAS, Ministru Jose Luis Guterres mos halao inkontru belateral ho Director Geral DEVCO (Developpement et Cooperation), Fernando Frutuoso de Melo, hodi hametin liu tan kooperasaun bilateral Comisaun Europeia.
Ministru Jose Luis Guterres hateten, ninia presensa atu fo agradesementu ba Comisaun Europeia nia apoio ba Timor-Leste, no mos atu hametin liu tan lasu kooperasaun entre Timor-Leste ho Comisaun Europeia.
