Europeia ajuda 4 Miloens Euro mai TL

Radio, online - Ministru Negosio Estranjeiru no Kooperasaun, Jose Luis Guterres ‘Lugu’ asina akordu ho Komisaun Europeia, husi departementu DEVCO (Developpement et Cooperation), hodi fo ajuda osan 4 miloens Euro ba nasaun Timor-Leste, hodi rezolve problema mudansa klimatika.

Iha asina akordu entre Ministru Jose Luis ho representante husi DEVCO ne’e, partisipa husi Embaixador Timor-Leste ba Bruxela, Belgia, Nelson dos Santos no Adjunto National Authorizing Officer (NAO), Madalena F. M. Hanja Costa Soares, Kuarta 11-12-2013, iha Embaixada Timor-Leste, iha Bruxela, Belgia.
 
Osan 4 Miloens Euro ne’ebe kalkula ba dolar amerika kuaje 5.6 miloens ne’e, sei entrega ba Ministeriu Agrikultura, hodi resolve situasaun mudansa klimatika iha Timor-Leste. Akordu ba osan 4 Miloens ne’e, ninia durasaun tinan tolu, hahu husi asina ne’e to’o tinan tolu remata.
 
“Eventu ida ne’e importante tebes ba povu Timor-Leste, tanba Timor-Leste hetan apoio husi Comisaun Europeia ba ajuda resolbe ita nia problema mudansa klimatika,”haklaken Ministru Jose Luis Guterres hafoin asina akordu.
 
Ministru Jose Luis hateten, hanesan Ministru Negosiu Estranjeiru no Kooperasaun, nia parte kontinua esforsu hodi halo kooperasaun diak ho nasaun no organisaun internasional sira iha mundu, hodi ajuda prosesu desenvolvimentu iha Timor-Leste.
 
“Hau bele hateten, visita mai Bruxela susesu tebes, tanba ita konsege asina akordu ida ho Komisaun Europeia no ita nia partisipasaun iha konselu ministru ACP mos lao ho diak,”haklaken Ministru Jose Luis Guterres.
 
Ministru Jose Luis Guterres mos afirma katak, Timor-Leste agradese boot teb-tebes ba Durão Barosso ne’ebe sempre tau prioridade ba Timor-Leste, liu husi Komisaun Europeia.
 
Ministru Jose Luis mos husu ba parte ne’ebe atu simu osan ne’e, bele ejekuta osan ne’e ho diak no ho transparansia, para nune’e bele resolve problema mudansa klimatika iha Timor-Leste, i nia fiar katak, Ministeriu kompetente ne’ebe simu osan ne’e sei ezekuta ho diak.