Komunikasaun sosial importante ba desentralizasaun

Radio, online - Sekertairu Estadu Desentralizasaun Administrativa (SEDA), Tomas Cabral iha nia palestra dehan, atu aslera programa desentralizasaun hodi hari’i munisipiu iha distritu presiza tebes meus komunikasaun sosial nia kobertura hodi divulga ba komunidade sira.

Tuir Tomas Cabral, nasuan ne’ebe atu dezenvolve media ou komunikasaun sosial nia prezensa importante tebes. Maibe media tenki halo tuir ninia padraun ho responsabilidade.


Tomas fo ezemplu, hanesan iha Guinea-Bissau, maske ukun-an tinan 40 ona, maibe foin dadauk mosu golpe, nee tanba laiha dalan ba media atu fo kontrolu sosial nomos dezenvolvimentu konsentra deit iha sentral. Povu iha area rurais la asesu ba dezenvolvimentu hodi hamosu konflitu sosial no sai nakfera.

“Ita Timor diak tebes tanba instituisaun hotuhotu halao nia knar ho responsabilidade, maske mosu haksesuk malu maibe sempre rona malu hodi hadia nasaun ne’e no povu nia vida moris. Ho ida ne’e ita nia programa Munisipiu iha tinan 2014 distritu balun tama ona ba prosesu munisipiu,”afirma Tomas Cabral ne’ebe oras ne’e dadaun responsabilidade resenseamentu eleitoral iha Guinea-Bissau.

SEDA Tomas hato’o nia palestra iha seminariu nasional  ho tema “partisipasaun komunidade iha dezenvolvimentu institusional ba radio komunidade” iha otel Ramelau, Segunda, (16/12).

Seminariu nasional ne’e organiza husi sekertariu Estadu komunikasaun sosial (SEKOMS) hetan servisu hamutuk ho Search for Common Ground no komisaun Europeia. Seminairu ne’e halao durante loron hat nia laran hahu dia 16 ate dia 19 Dezembru tinan ne’e.

Sekertariu Estadu Tomas hatutan, iha V governu konstitusional antes lejislatura ne’e remata iha 2017, bele hari ona pelumenus, munisipius 3 to’o 5. Tuir iha programa Planu Dezenvolvimentu Estratejiku Nasional iha distritu 4 mak sei sai munisipiu uluk mak hanesan, Distritu Dili, Baucau, Bobonaro no Oecusse. Maibe ba oin sei hare preparasaun rekursu humanus hodi jere programa iha nivel munisipiu, liu husi kapasidade administrativa. 

Iha fatin hanesan, Sekertariu Estadu Komunikasaun Sosial (SEKOMS), Nelio Issac Sarmento dehan, politika iha seitor komunikasaun sosial hahu forma governu ida ne’e, bazeia ba Konstituisaun RDTL iha alineamentu ho politika nasional komunikasaun sosial no planu estratejiku ba dezenvolvimentu nasional.

“Hau hakarak hahu hodi hatete, ita hotu konsiente no aseita katak, iha kontekstu kontruksaun estadu TL nian “direiru ba informasaun, liberdade expresaun, no liberdade imprensa vital ba konsolidasaun demokrasia, unidade no koezaun nasional”.

Prioridades difinidu iha planu pluriannual SEKOMS nian mak elabora lei imprensa, estabelesementu ajensia notisias, institute nasional formasaun jornalista, konselhu imprensa no anualmente kontinua apoia media TL, liu husi programa enkorazamentu diversidade meius komunikasaun sosial.