Radio online – Liu husi kongresu extra-ordinariu, asosiasaun jornalista ne’ebe koinesidu ho naran Timor-Leste Press Club (TLPC) nakfila ba naran foun Timor-Leste Press Union (TLPU).
Kongresu extra-ordinariu ne’e halao iha loron Sabadu, (8/2) iha salaun Ministeriu Solidariedade Sosial (MSS).
Tema ba kongresu extra-ordinairu “Globaliza Organizasaun Hodi Hametin Profisionalizmu Jornalista”.
Iha abertura kongresu ne’e, Sekertariu Estadu Komunikasaun Sosial (SEKoms), Nelio Issac Sarmento dehan, asosiasaun jornalista importante tebes hodi halibur jornalista, halao programa formasaun no defende jornalista nia direitu wainhira mosu kazun ruma hasoru jornalista.
Tuir Nelio, kongresu ne’e atu muda naran husi Press Club ba naran seluk presiza halo diskusaun ne’ebe klean durante loron tomak ida ne’e. Los duni, Press Club ne’e hanesan grupo kiak oan ida, ninia karakteristiku laos asosiasaun ne’ebe halibur ema barak.
“Hau husu ba membru Press Club sira atu iha kritiku hodi hare ba oin wainhira atu muda naran, tanba husi tema ne’e hatudu katak asosiasaun jornalista sira tenki hakat an ba oin no loke liras ba oin,”dehan eis fundador Press Club ne’e.
Durante diskusaun nia laran mosu ideias oioin, maibe maioria membrus sira hakarak muda duni naran Press Club ba naran seluk.
Iha diskusaun konaba statuta, inisiador TLPC Domingos Saldanha hili dalan rezigna-an husi kongresu ne’e ho nia argumentu lakoi muda naran TLPC. Ho Domingos Saldanha ninia rezignasaun, maibe maioria membru TLPC kuaze 100 resin hakarak duni muda naran, ho razaun laos ba ema individu nia intereses maibe ba jornalista sira mak hamahan-an iha TLPC.
Iha tinan 2013 iha salaun MSS liu husi konferensia nasional hodi hamosu naran tolu (3) mak hanesan Uniaun Jornalista Timor-Leste (UJTL), Timor-Leste Press Union (TLPU) no Timor-Leste Press Federation (TLPF). Naran 3 ne’e ne’e mak lori mai kongresu extra-ordinairu hodi hili.
Liu husi sistema demokrasia, iha vota segredu. Membrus sira hili husi naran 3, maibe tenki liu votus 2/3.
Iha votasaun segredu ne’e TLPU mak sai manan maioria ho votus 49, UJTL 25, TLPF 2 Nulu 2.
Prezidenti TLPU, Jose Belo dehan, asosiasaun jornalista iha nasaun ne’e marka tan istoria hodi nakloke an liu husi muda naran ne’e. tuir Jose Belo, Press Club la mate, maibe sai grupo ida hamaha-an iha TLPU nian ho nia programa internal.
“Hau fiar katak rezultadu husi kongresu ne’e sei hadiak liutan asosiasaun jornalista ida ne’e ho profesionalizmu,”dehan Jose Belo.
