Fundasaun Mahein lansa (FM) relatoriu ho objetivu husu ba Parlamentu Nasional nu’udar orgaun fiskalizador atu sai guarda ne’ebe diak iha ezekusaun OJE 2014 ba seitor Defeza no Siguransa. Lia hirak ne’e haktuir husi Direitur Esekutivu Fundasaun Mahein, Nelson Belo iha abertura lansamentu relatoriu kona-ba “Nota Importante iha Ezekusaun OJE 2014 Ba Seitor Defeza no Siguransa (prespetiva Sosiadade Sivil)”. Iha salaun konferensia Timor Plaza, andar 5, iha loron 31/3/2014.
Direitur Ezekutivu Fundasaun Mahein salienta liutan katak “Relatoriu ne’e aprezenta nu’udar meius ida hodi kontribui ba ezekusaun Orsamentu Jeral Estado (OJE) 2014 husi prespetiva sosiadade sivil ba seitor defeza no seguransa, rekomendasaun sira ne’e hanesan kritika konstrutivu no laos ataka pesoal ruma”.
Nia mos hateten ho lian deskontente “ tuir lolos membru Parlamento Nasional, komisaun B no Sekretariu Estado Seguranca hola parte iha tempu lansamentu ne’e maibe sira la marka presensa”, dehan nia. Joao Almeida, Adjuntu Fundasaun Mahein iha parte aprezentasaun relatoriu iha slide haktuir katak “Orsamentu Jeral Estadu (OJE)2014 ne’ebe mak Parlamentu Nasional aprova iha ne’ebe promulga ona husi presidente Republika no dadaun ne’e iha ona ezekusaun nia laran.
Instrumentu politika ne’ebe Timor-Leste iha hodi dezenvolve estadu ida ne’e mak politika fiskal liu husi OJE.Pratika no jestaun diak iha implementasaun OJE nu’udar dever instituisaun estadu hotu hodi garante sustentabilidade vida Estado nian.importante liu Ministeriu Defeza no Seguransa (MDS) konsidera iha prosesu ezekusaun OJE 2014 nian.iha ne’eba MDS presiza konsidera tuir rekomendasaun relatoriu auditorial Deloitte nia ba MDS iha 2012 no esperensia ezekusaun OJE 2013 husi MDS sei iha ireguladade balu izemplu kuantidade sasan ne’ebe atu sosa diferensa entre orden sosa nia no kontratu”.
Sekretariu Estadu Defeza (SED), Julio Tomas Pinto iha nia deskursu hateten katak “Nudar Guvernu, simu relatoriu ne’e no simu saida mak sai nudar preokupasaun sosiedade sivil nian, ita bo’ot sira nia intervensaun ida ne’e hanesan input ida ba guvernu para bele hadia”.
Sekretariu Estadu Defeza (SED), hatutan liutan katak “Relatoriu ne’e diak, no espera katak erru sira ne’ebe iha la akontese iha Sekretariu Estadu Defeza (SED)”.
Fundasaun Mahein (FM) hari’I iha 2009, nudar organizasaun naun-govermentais ne’ebe halao knar Monitorizasaun, peskiza no halo Advokasia ba seitor Defeza no seguransa iha Timor-Leste.
