Jornalista Nain 25 Sei Desloka ba Jakarta

Radio online - Guvernu liu husi sekretariu estadu komunikasaun social (Sekoms), sexta feira loron 08/08/14, hala’o ceremonia despedida ba jornalista hamutuk nain 25, inklui feto (8), no mane (17),  Sira mai husi media imprimi no elektronika iha Timor-Leste hodi ba tuir formasaun durante fulan rua iha Lembaga pers Dr. Soetomo (LPDS) Jakarta, Indonesia.

Iha seremonia ne’e, sekretariu Estadu Komuniksaun Social, Nelio Isaac Sarmento, hateten jornalista hanesan pilar Importante iha nasaun Timor-Leste, tan ne’e presija iha kapasitasaun ne’ebe diak hodi kontribui ba dezevolvimentu Nasional.

Iha biban, Nelio Isaac husu ba jornalista sira hodi uja oportunidade ne’e ho didiak no hatudu atitude nudar Jornalista Timor oan. “husu ba formandu sira atu uja didiak oportunidade hirak ne’e no hatudu atitude ne’ebe diak durante iha formasaun nia laran”. Dehan Nelio Isaac, iha Palacio do Guverno.

Nia mos hatutan tan katak, formasaun ne’ebe mak hala’o iha LPDS Jakarta hanesan premeiru delegasaun jornalista Timor oan sira no faze tuir mai sei aumenta tan numeru jornalista iha area kapasitasaun rekursu humanu nian. Durante fulan rua ne’e formandu sira sei aprende teoria no fulan ida sei halo Estajiu iha Media sira iha Indonesia hanesan, Televisi trans Media, ANTV, Metro TV, Indosiar,televisi MNC News , Media Siber Kompas.com, Detik.com., Okizone.com., Radio Trijaya FM, Radio Sonora,no mos media elektronika sira seluk.

Tuir agenda ne’ebe iha, formandus sira sei desloka ba Jakarta iha loron 11 Agustu 2014 no fila hikas mai iha Timor-Leste iha 11 outobru 2014.