Dili_Radio Online_Atu hametin konhesimentu stakeholder hotu-hotu ne’ebe servisu ba asuntu rai kona ba analiza wainhira hasoru asuntu kona ba rai, HAK liu husi apoiu Uniao Euorpeia, orgniza work shop iha loron sexta-feira (18/9/14), iha salaun HAK, Palapasu, Dili.
Deometro de Carvalho, fundador Haburas, nu’udar fasilitador workshop, imforma katak “workshop ne’e nia objektivu atu hametin konhesimentu konaba analiza stakeholder hotu-hotu ne’ebe servisu ba asuntu rai, husi Governu, NGO, Midia no Akademia bainhira sira iha asuntu konaba rai, parseiru sira ne’e ita bolu parseiru estrategiku, tamba ne’e bainhira organizasaun hatene didiak nia mapa parseiru sira bele halo servisu diak liu hodi atinji rezultadu saida mak sira persija, workshop ida ohin koalia focus liu konaba rai, koalia konaba distribuisaun rai ba ema hotu, ema hotu iha direitu ba uma no rai inklui mos feto”.
Iha fatin hanesan Filomena Fuka, nu’udar partisipante, husi organizasaun Rede Feto, hateten katak “treinamentu ida ne’e importante tebes oinsa atu bele kria stake holder, ba servisu ligasaun ne’ebe iha, atu bele halo manajementu ba komunikasaun ne’ebe iha, liu-liu atu halo advokasia ba orgaun sira ne’ebe iha kompetensia relasiona ho asuntu rai nia, liu-liu liga ba baze legal ka lei ba rai nian, atu nune’e lei refere bele fo mos benefisiu diak ba povu liu-liu ba feto maluk sira, iha lei dala ruma koalia ne’e perfeitu lahalimar maibe implementasaun ne’e susar tebes, sei iha diskriminasaun ba feto sira, tamba feto sira dala barak sira labele hetan sira nia direitu atu sai nain ba rai, tamba ne’e maka treinamentu ida ohin importante tebes, oinsa mak atu bele halo mapamentu ka mapa ba lina koordenasaun ba servisu nian, e liu-liu atu haforsa parte advokasia nian”.
Filamena mos imforma katak “hau hanoin ita koalia konaba baze legal, konstituisaun RDTL assegura katak ema hotu-hotu iha direitu ba kualker saida deit inklui mos rai, maibe iha implementasaun ne’e mak hamosu diskriminasaun ne’ebe mak integra la lao ona tuir lei ne’ebe mak iha, hau hanoin katak feto mos iha direitu, kuandu ita koalia konaba padraun direitus humanus nian ema hotu-hotu iha direitu atu assesu ba setores hotu-hotu, tamba ne’e feto mos iha direitu atu assesu ba rai no mos bele sai nain ba rai, la signifika katak direitu ne’e ba deit mane, e ita haree konaba ita nia sistema kultura ne’ebe mak iha, iha kultura balun bolu dehan patriakal no balun matrilineal, patriakal ne’e signifika katak kuandu feto ida kaben tenke sai husi nia uma lisan ba tama iha nia laen nia uma, e liu husi ida ne’e aplikasaun husi inan-aman ne’e maka halo diskriminasaun ba oan sira, tamba bainhira feto ida kaben sain nia laiha ona direitu atu assesu ba proproridade no eransa ne’ebe nia inan-aman iha, maibe lolos ita kuandu koalia konaba direitus humanus ne’e ladefini katak feto kaben sai laiha ona direitu, tamba ne’e maka importante tebes oinsa atu hasae konsiensia ba inan-aman sira ne’ebe iha, katak sira tenke halo tratamentu ida ne’ebe hanesan ba sira nia oan mane no feto, maske nia kaben sai ona maibe nafatin iha direitu ba eransa ne’ebe nia inan-aman iha tenke fahe hanesan, iha matrilineal mos hanesan wainhira feto sira kaben sira labele sai husi nia uma e sira mak iha direitu liu atu hetan eransa husi inan-aman, ne’e mos parte ida halo diskriminasaun ba sira nia oan mane ne’ebe kuandu laiha direitu ba eransa husi inan-aman nian, iha parte seluk maske feto ne’e iha direitu ba eransa sira husi inan-aman maibe parte balun ita hare katak dalaruma feto labele foti desizaun iha sira nia uma lisan, maske feto sira mak sai hanesan domina ka jerasaun kontinuasaun ba uma lisan refere, maibe iha parte foti desizaun ne’e feto sei hetan diskriminasaun, hau hanoin tenke kria lei wainhira kazu konaba disputa ba rai, hadau malu rai, hadau malu eransa ne’ebe sira nia inan-aman husik, aman ne’ebe iha fen rua, depois iha hotu oan, ida ne’e labarik sira ne’e iha hotu direitu atu hetan eransa husi nia aman tamba oan ne’e fas parte mos husi nia aman ne’e tamba sira mai husi aman ida deit, hau hanoin ida atu hasae liutan konsiensia komunidade ou familia ne’ebe hasoru problema hanesan ne’e, lei ne’e maka tenke assesgura lei ne’e tenke regula atu nune’e wainhira hetan problema ida hanesan ne’e lei ne’e maka bele fo garantia oinsa atu bele fahe eransa no mos rai ne’ebe iha justu ba familia refere, liu-liu ba oan sira atu nune’e labele kria konflitu iha familia ida nia laran”.
