Dili, Radio Liberdade_Fundasaun mahein halao lansamentu ba relatoriu “Fundasaun Mahein nia lian iregularidade iha promosaun estraordinariu polisia nasional Timor-Leste (PNTL) Tinan 2012” no relatoriu “Politika kriasaun Polisia sientifika ivestigasaun kriminal (PSIK) Parseiru no Ameasa ba instituisaun Seguransa", Kinta (25/9/2014) iha Salaun CAVR Balide.
Hafoin lansamentu ne’e, Komando Geral das operasoens Distritu Dili, Armando Monteiro ba jornalista hateten katak “ ami apresia tebes ho relatoriu ne’e, tamba liu husi relatoriu ida ne’e, bele mos identifika ami nia frakeza, ami nia failansu, liu husi ne’e mos hanesan korajen ami, motiva ami atu iha future ami hadia ami nia an diak liu tan”.
Armando realsa “buat balu talvez presiza, peskiza ne’e, labele rona husi parte ida deit maibe rona husi parte hotu-hotu, tanto komando, tanto elementu sira rasik, e husi mos unidade departamentu ne’ebe mak halao nia knar, hodi nune’e kruza imformasaun ne’ebe mak sai ne’e iha ninia kualidade”.
Iha fatin hanesan Direktor Fundasaun Mahein Nelson Belo haktuir katak “ kada Relatoriu analiza klean konaba konteudu lacuna sira ne’ebe mak akontese iha kriasaun polisia sientifika investigasaun criminal nune’e mos ba promosaun sira ne’ebe maka durante ne’e governu halo, e promosaun akontese dala rua ona iha promosaun permeiru ne’ebe maka akontese fo sai katak iha iregularidade barak ne’ebe ikus mai la motiva membru PNTL sira ne’ebe maka hetan promosaun no mos lahetan promosaun, tamba balun ne’ebe mak hetan uluk sira membru, e ida ne’ebe maka sira nia komandante lahetan promosaun maibe wainhira sira hetan promosaun atu ba troka fali sira nia komandante ida ne’e mos implika ba sira nia knar lor-loron nian, entaun iha ne’eba kria lamentasoens barak, ida seluk foin dadaun 2012 promosaun ida ne’ebe mak akontese tuir dekretu lei ne’ebe mak indika iha relatoriu ne’e katak promosaun ne’e atu aplika ba ema sira ne’ebe mak veteranus, agora implementasaun ne’e laos ba veteranus deit maibe ba ema hotu, ne’e sai kestaun boot ida”.
