Dili, Radio Online_BELUN Servisu hamutuk ho Fundasaun Haburas realiza treinamentu ida ho tema “Mediasaun no Resolusaun Konflitu, Land & Housing Justice Action ” iha loron 24 ate 26/9/2014 iha salaun Fokupers, Farol , Dili.
Hafoin treinamentu ne’e treinador ou fasilitador ba treinamentu, Izal Coreia Pinto imforma katak “ treinamentu ne’e nia objektivu hakarak atu kapasita membrus rede ba rai, atu sira iha konhese klean konaba oinsa atu fasilita mediasaun ba problema rai ne’ebe mak akontese iha Timor-Leste, hodi nune’e bele ajuda komunidade sira ne’ebe enfrenta problema ba rai atu bele hetan solusaun ida liu husi konkordansia ne’ebe sira rasik maka deside atu labele iha dezentendementu entre komunidade liga ho problema ne’ebe sira hasoru, e material ne’ebe mak ami uja fasilita sira iha treinamentu ne’e mak etapa –etapa mediasaun, oinsa maka mediasaun ne’e atu halao, e materia seluk konaba oinsa itabele halo negosiasaun entre ita ho ita nia maluk sira ne’ebe iha problema laran para hodi hetan solusaun, hodi nune’e bele hametin nafatin paz no dame, ida seluk tan ami mos uja metode simulasaun pratika, oinsa mak ema ida-idak bele pratika material ne’ebe sira aprende iha treinamentu laran, atu nune’e depois de treinamentu ida ne’e, sira bele iha esperiensia atu nune’e bele fasilita mediasaun ho diak”.
Izal mos hatutan tan katak “ba oin ami sei iha tan planu atu realize tan treinamentu ba Autoridade lokal sira iha distritu sira ne’ebe sai hanesan tarjetu ba ami nia programa, atu nune’e sira bele ajuda komunidade sira iha baze, hetan solusaun ba sira nia problema liu husi konkordansia, laos ema seluk mak atu impoin ka influensia desizaun ruma iha sira nia problema”.
Iha fatin hanesan Julmiro da Silva Madeira nu’udar partisipantes ba treinamentu ne’e hateten katak “ liu husi treinamentu ida ne’e tulun ami atu ami bele komprende konaba etapa mediasaun, e mos oinsa atu bele komprende diak konaba prinsipiu etika, nune’e mos lalaok mediasaun ninian wainhira hasoru komunidade sira iha terrenu, bainhira ema nain rua ou grupu rua halo konflitu, material mediasaun ne’ebe mak durante loron tolu ne’e ami hetan foka liu ba iha konflitu ba rai ka disputa rai entre ema individu ho individu ou entre komunidade grupu ho grupu”.
Julmiro mos salienta tan katak “ treinamentu ida ne’e importante teb-tebes e pratikamentu lisaun ne’ebe mak hetan ne’e sei lori ba aplika no ami sei uja iha ami nia knar ida-idak iha ami nia organizasaun no mos iha komunidade nia leet”.
Treinamentu ne’e, partisipasaun husi membru Rede ba Rai no mos membru governu hanesan PDHJ e Diresaun Terras e propriedades, total partisipantes hamutuk 30 etal pessoas e treinamentu ne’e hetan suporta husi komisaun Europeia liu husi Fundasaun Haburas.
