Eskola Pre Sekundariu Laiku, Inagura

Dili, Radio Online_Vise Primeiru Ministru, Fernando La Sama de Araujo, akompanhadu hosi embaixador Japaun mai Timor-Leste, Eiji Yamamoto, hakat-an ba distritu Lospalos hodi inagura eskola Pre Sekundariu Laiku, iha suku Fuiloro sub distritu Lautem. 

Konstrusaun eskola ho aulas hamutuk 34 ne'ebe konsege akomoda estudantes hamutuk na'in 504 no profesores na'in 25 ne'e, hala'o hosi Fundasaun "Amor" iha durante fulan rua nia laran no hetan fundus hosi governu Japaun ho total osamentu 121 Dolares Amerikanu.

Iha ninia intervensaun iha seremonia ne'e, Vise Primeiru Ministru hateten katak nia rekonhese katak durante ne'e mosu problema barak iha area edukasaun ne'ebe perciza atensaun maka'as hosi governu, maibe, ho inagurasaun eskola ne'e, governu konsege ona rezolve problema balun iha area ida ne'e.

Vise Primeiru Ministru mos agradese povu japoneza ne'ebe durante ne'e liu hosi sira nia governu fo ona apoiu barak mai povu Timor-Leste liu hosi projetu oi-oin. 

Iha tempu hanesan embaixador Yamamoto mos enkoraja estudantes sira atu estuda maka'as liu-tan. 

Osamentu ba projetu ne'e oferese hosi embaixada Japaun liu hosi Fundu Asistensia ba Seguransa Humana ba Komunidade sira iha Area Rural (GGP). Ho skema GGP ida ne’e, Governu Japaun implementa ona projetu 80 liu iha Distritu 13 iha Timor-Leste desde tinan 2000. Implementasaun hosi skema ida ne'e fokus liu ba iha atividades promosaun ekonomia, agrikultura no dezenvolvimentu rural, inklui dezenvolvimentu kapasidade ba governu no setor publiku. Projetu ida ne'e rasik nu'udar projetu ba dala hitu nian iha Disritu Lautem.