
Dili, Radio Online- Dadaun numeru HIV SIDA aas iha Dili, Bobonaro no Baukau, lia hirak ne’e haktuir husi Doutor Avelino Guteres Correia iha seminar ho tema “Mai ita Hamutuk Hapara Transmisaun HIV SIDA iha Timor-Leste no Konsolidasaun Advokasia prevensaun HIV ba Autoridade Lokal” iha Salaun Dom Bosco, Komoro, Dili, Fulan ne’e, ne’ebe organija husi Komisaun Nasional Kombate HIV SIDA
Nu’udar orador ba seminar ne’,e Doutor Avelino mos hateten katak “Moras HIV/SIDA laos mai husi relasaun seksual deit, maibe mos HIV/SIDA ne’e bele mosu husi instrumentu saude nian hanesan daun”.
Sekretario Ezekutivu Kombate HIV SIDA Daniel Marcal afirma katak “ Komisaun halo konsolidasaun sobre prevensaun HIV/SIDA ba autoridade local sira nune’e bele fahe fali informasaun ba komunidade hodi hatene, husu ba lider komunitaria sira atu kolabora hamutuk ho komisaun hodi habelar informasaun ba joven, tamba moras HIV/SIDA aumenta ba bebeik”.
“Kuaje ema 40 resin mate tamba moras ne’e”, informa Daniel.
Vise Permeiru Ministru nudar mos Presidenti Komisaun HIV/SIDA, Fernando Lasama haktuir “Kombate HIV/SIDA ne’e importante tebes, tamba ne’e tengki luta duni hasoru virus refere”.
Iha fatin hanesan xefi Suku Maskarinas Mateus de Jesus Valente ne’ebe partisipa mos iha seminariu ne’e, rekomenda katak “nu’udar lider komunitario, hau husu atu labele halo deit enkontru boot hanesan nune’e iha nasional, maibe tun ba iha mos ba baze e rekolla dadus konaba HIV SIDA kada aldeia atu nune’e ita bele hatene iha aldeia ida ema nain hira mak hetan HIV SIDA“.
Aleinde ne’e administrador Subdistrito Kristu Rey, Jack Smith hateten katak “ ho sorumutu ida ne’e bele fahe imformasaun e ita hamutuk kombate duni HIV SIDA”.
