Dili, Radio Online_Timor Leste Livre husi Korupsaun no dedika ba luta hasoru korupsaun ho hanoin katak mesak ita labele hamutuk ita bele mak vizaun no misaun Gopac Timor Leste, ne’ebe lansa iha loron 8/10/14 iha salaun Palm Centre, Dili, husi Vise Presidenti Parlamentu Nasional, Aderito Hugo, Presidenti Ezekutivu GOPAC, Francisco Miranda Branco, Preisdenti Ezekutivu TELKOMSEL, Dedi Suriatman, Reprejentante RTTL, Paulino Quintas, Reprejentante Timor Telekom, Maria Lusia Barreto ho hanehan power hatudu katak GOPAC lansa ona.
“Atu luta hasoru korupsaun ho promove Governasaun ne’ebe diak nudar objektivo komum GOPAC nian, e liu husi mensajen sira GOPAC nian iha midia, liu husi peskija, liu husi mujika, fanun konsiensia nasional luta kontra korupsaun tamba luta kontra korupsaun labele hein deit instituisaun governu nian”, dehan Presidenti Ezekutivu GOPAC Timor Leste, Fransisco Miranda Branco.
Vise Presidenti Parlamentu Nasional, Aderito Hugo, iha nia deskursu hateten “GOPAC hanesan pasu ida ba Timor Leste atu hakat ba ASEAN, hein katak odomatan GOPAC loke ba entidades hotu hotu, sosiedade sivil, parte hotu hotu elabora atu bele fo ideia, fo hanoin nafatin ba ema hotu, ba Governantes sira atu kuidadu ituan ho planu orsamentu, ba Parlamentu Nasional tengki hare didiak wainhira atu halo aprovasaun ba orsamentu”.
Direitur Exekutivu, Organijasaun Nao Govermental FONGTIL, Arseino, ne’ebe partisipa mos iha lansamentu ne’e haktuir nia hanoin katak “Prejensa GOPAC nian, importante tebes, hanesan ohin, intervensaun husi Vise Presidenti Parlamentu Nasional, ne’ebe hateten katak atu luta kontra korupsaun, atu prevene korupsaun, ne’e laos instuisaun ida nian, ne’e ema hotu tengki fo liman ba malu atu nune’e ita bele, minimu tengki prevene, kuandu ita prevene ona, klaru katak la to’o ona korupsaun, tamba ema hotu iha kesadaran, iha sensibilijasaun, ba krimi korupsaun”.
Kona ba lei anti korupsaun, Presidenti Komisaun A, Parlamentu Nasional, Karmelita Kaetano Moniz, informa katak “Lei anti korupsaun ba iha meja Parlamentu, agora hein deit bainhira mak lideres bangkadas sira tur hamutuk hodi tau iha ajenda para meja bele baisa ona ba komisaun A hodi halo aprosimasaun ba projetu de lei anti korupsaun ida ne’e, ami hein deit husi meja, tau iha ajenda dopois baisa”.
Presidenti Komisaun A ne’e mos hateten katak “hau senti imposibel karik, tamba dia 15 de outoubru, orsamentu tama ona, se iha prosesu orsamentu, aktividade saida saida deit tengki pending, pending aktividade hotu ingklui mos halo legislasaun, ne’ebe tinan ida ne’e laiha ona posibilidade atu Parlamentu Nasional debate e aprova lei anti korupsaun, mais ita hein tinan oin ita bele debate ba lei anti korupsaun”.
Kona ba komitmentu luta kontra korupsaun, Presidenti Komisaun A koalia, “hau senti ema hotu iha komitmentu, ita boot sira hare rasik katak, PN, Deputadu sira iha ne’eba, ami iha sekretariadu ida GOPAC nian, ne’e atu hatudu katak kompromisiu Deputadu sira nian nudar legislador ba atu hamenus, hapara, kombate korupsaun, e prevene korupsaun maximu tebtebes”.
Partisipa iha lansamentu ne’e, Vise Presidenti Parlamentu Nasional, Aderito Hugo, Ministru Justisa, Deonisio Babo, Komisaun KAK, Provedor Direitus Humanus e Justisa, Vise Ministra Edukasaun, Sosiedade Sivil, ingklui midia.
GOPAC Timor Leste hari iha 14/6/2010, husi membru Parlamentu hamutuk ema nain 27 husi Deputadu no Deputada ativu no non-ativu.
