Lakon Ou Manan, Ne’e Normal Iha Kompetisaun.

Dili, Radio Online-Governu  liu husi Sekretariu Estadu Joventude e Desporto halao kompetisaun Banda Muzika iha loron Sesta-feira 10/10/2014, iha  Stadion Dili ne’ebe partisipa husi eskola sira ne’ebe mai husi 13 distritu.

Iha biban ne’e, Sekretariu Estadu Juventude e Desportu Miguel Manetellu hateten katak sai nu’udar joven tenke esforsu an makaas, badinas ho disiplina, “hau husu ba estudante ou joven sira, esforsu trenu, badinas ho disiplina, e labele lakon vontade ba sira ne’ebe mak  lakon, tamba kompetisaun ne’e tenke iha manan no lakon, lakon  ka manan, ne’e normal, importante mak esforsu a’an, e hau husu ba joven Timor oan sira tomak, hatoman an atu simu realidade lakon wainhira iha kompetisaun ruma, kuandu lakoi simu realidade saida mak sei akontese, problema mosu, ne’eduni hau husu ba joven sira katak hatene simu manan, hatene simu mos lakon”.

SEJD hatutan liutan katak “premiu ba primeiru lugar hetan  USD$ 2.500 dollar, segundu lugar  USD$ 2.000 dollar no terceiro lugar USD$ 1.500 dollar”.

Iha fatin hanesan estudante  Vrenda Olivia Aida Cristi nu’udar maioret husi banda muzika ne’ebe sai vencedor ba kompetisaun ne’e hateten katak “hau kontente, sente orgullu tebes tamba ami nia esforsu an durante ne’e hetan rezultadu ne’ebe mak diak, sai primeira lugar e sai vencedor ba kompetisaun ida ne’e”.

Vrenda konfesa obstaklu ne’ebe hasoru molok kompetisaun “difikuldade mai ami mak, dala ruma ami koalia larona malu, professor sira iha eskola balun ladukung ami, maibe ami koko esforsu an nafatin to’o agora,   e ba oin ami sei  esforsu an maka’as e prepara an diak liu tan hodi tuir kompetisaun hanesan ne’e”.

Entretantu prezidente komisaun organizadora Augustu Mario Gonzaga Sarmentu informa katak “ objektivu eventu ne’e atu habelar liu tan joven sira nia talentu  iha area drum band nian, e eventu ne’e rasik e total fundus ne’ebe uza ba aktividade ne’e hamutuk  USD$  72.814 dollares Amerikanu”.