Matadalan koopera ho Cristal, Konhese Mundu Midia

Dili, Radio Online_Jornal Matadalan  hala’o kooperasaun  ho Eskola Cristal hodi  fo formasaun ba Estudante Cristal nain 20,  iha area jornalismu nian ho objetivu atu hasa’e sira nia koñesementu kona ba serbisu jornalista nian.

Sekretariu Estadu Komunikasaun Sosial, Nelio Isaac Sarmento, iha nia intervensaun hateten,  inisiativa husi Jornal  Matadalan  ho Eskola Cristal hanesan koperasaun ida ne’ebe diak atu kontribui no tranforma  matenek  ba jerasaun foun.
“papel orgaun komunikasaun sosial sira laos atu informa deit informasaun sira ne’ebe estadu no membru guvernu sira halo maibe presija kontribui imi nia matenek ruma ba jerasaun foun no joven sira ne’ebe mak iha interese ba profisaun jornalista ” dehan Nelio, iha Salaun  Eskola Krsital Balide, sexta feira 10/10/14.
Iha fatin hanesan, Director Matadalan, Cansio Ximenes, informa, formasaun ne’ebe mak sei  hala’o ho durasaun fulan tolu ne’e, atu fahe esperensia kona ba servisu jornalista nian, liliu kona ba jornalismu básiku nian.
“iha formasaun ne’e ami sei foka liu ba jornalismu basiku, hanesan tekniku hakerek, entrevista no mos tekniku hakerek feature tamba Jornal  Matadalan hanesan media ne’ebe nia publikasaun Semanal, tan ne’e tipu hakerek notisia ba  liu feature news  ”dehan Cansio.
Entertantu, Chefi Fundasaun Eskola Cristal Agustinho dos Santos esplika formasaun ne’e  to’o fulan tolu e semana ida dala rua, sexta ho sabadu, no  hare mos ba estudante sira nia orariu livre, tamba inklui mos estudande sira  husi ensinu Pre-Sekundariu, Sekundariu ho Universitáriu.
Iha biban ne’e, estudante Secundaria Cristal, António Fatíma, senti  kontente ho  koperasaun  entre media Matdalan ho Eskola Kristal, tamba  bele hasa’e tan sira nia kapasidade iha area jornalismu nian.
Antes ne’e  fundasaun Kristal mos halo Koperasaun ho  media Suara Timor Lorosa’e (STL), iha area kapasitasaun jornalismu Basiku nian.