Komunidade Suku Kotolau Kontenti, Asesu Estrada Diak.

Dili_Radio Online_Direktor  Jeral  ILO R4D (Road For Development) hamutuk ho Direktor jeral obras publika halo vizita ba konstrusaun estrada iha Suku kotolau distritu Aileu subdistritu Laulara iha loron Tersa(16/12/2014). Ho objektivu hakarak rona no hare saida mak komunidade sira sente depois hetan Estrada foun ba sira nia suku laran.

 “ Ami  husi ILO kontente teb-tebes atu ajuda  belun sira husi obras publika hodi hamosu estradas ba area rural sira” lian hirak ne’e hato’o husi Direktor jeral ILO, GUY Riard wainhira halo vizita ba Suku Kotolau.

“ mai hau importante tebes atu hare rasik komunidade sira iha suku ida ne’e, no atu hatene saida mak sira sente wainhira  sira bele ona atu  assesu ba Estrada, tamba komunidade sira mos fasil atu  bele dezenvolve moris familia nia no bele dezenvolve produtu local sira husi area rurais lori ba to’o iha nasional ”. Dehan Direktor Jeral  ILO.

Sefi Suku Kotolau reprezenta Adminstrador do posto Laulara Abiliu Alves hateten “komunidade  husi suku Kotolau desde okupasaun Indonesia to’o ukun an nunka assesu ba Estrada,  maibe ho koopreasaun Governu Timor-leste liu husi ministerio publiku ho ILO iha tinan 2012 to’o agora komunidade bele ona assesu ba Estrada ne’ebe diak, komunidade sira bele ona transfere sira nia produtu local ba iha merkadu ”

“ hau sente kontente tebes tamba dadaun ami bele ona assesu ba Estrada ho kualidade ne’ebe diak, no fo benefisiu tebes mai ami iha suku ida ne’e, ami nia oan sira mos fasil atu assesu ba Edukasaun”.  hateten Julino nu’udar komunidade Suku Kotolau sub-distritu Laulara.

Julino Rekomenda tan katak “se bele halo kontinua tan Estrada ne’e ba suku Talitu no Suku Madabeno  mais ou menus 500 metros tan atu nune’e komunidade  husi  suku rua ne’ebe  vizinu ho suku Kotolau ne’e mos bele assesu hotu ba Estrada ”.

Konstrusaun ne’e rasik kaer husi kompanha CP LDA. Durante fulan walu (8), sira halao konstrusaun dalan husi Laulara Vila ate Suku Kotolau.