AMRT : Atu Konserva Momoria ba futuru, sei Realiza Konferensia Internasional

Dili, Radio Online, Diretor Arkivu Museum Rejistensia Timorense (AMRT), Hamar Antoninho Babtista Alves, Kuarta14/01/2015, informa ba Radio Liberdade, katak sei realize konferensia internasional hodi konvida peskizadores husi Nasionais no Internasionais, atu koalia kona ba interese istoria nian iha futuru.

Diretor ne’e haktuir katak objetivu husi konferensia Internasional ne’e atu kruza kultura husi nasaun sira ne’ebe uja lian portuguesa, hodi hamosu hanoin atu konserva memoria ba historia iha future no  hakerek livru atu sai hanesan referensia ba jersaun foun, “iha koferensia ne’e mos ita sei husu idieas husi espesialista sientifika sira atu halo forsa liu tan ita nia hanoin atu oinsa hare ba istoria Timor-Leste nian iha future, parte seluk atu koopera hamutuk hodi koalia kona ba interese istoria iha futuru”, tenik Babtista Alves iha ninia servisu fatin.

Nia esplika katak konferensia ne’e sei konvida oradores sira ne’ebe hola parte iha Organizasaun CPLP hanesan Portugal, Moçambique, Angola, Cavo-Verde, Brazil inklui mos oradores nasionais sira hanesan, Reitor UNTL, Aurelio Guiterres, president do Institute da Língua portuguesa, Benjamin Cortereal, Abilio de Araujo, Max EXthal, nudar autor dokumentariu ba masakre Santa Cruz,  Eis Primeiru Ministru Mari Alkatiri, Director AMRT, no oradores seluk tan.

Director ne’e mos informa katak inisiativa mai husi nia rasik desde iha tinan 2010 maibe tamba kestaun rekursu humanu, tempu no konsolida fatin ho nune’e foin realize iha tinan ida ne’e.

Konferensia Internasional ne’e sei hala’o durante loron rua nia laran hahu iha loron 26-27/01/2015 iha salaun Ministeriu Negosiu Estrageiru (MNEC).

Nia klarifika liu tan katak aktividade ne’e hetan apoiu husi União Europia, Univesidade NasionalTimor Lorosa’e (UNTL), Comunidade Países da Língua Portuguesa (CPLP,) Timor Telecom, Fundasaun Oriente, Ótel Timorno hetan apoiu mos husi parte guvernu nia hanesan, Sekretáriu Estadu Komunikasaun Sosial, Sekretáriu Estadu kultura nian, no orgaun guvernu seluk ne’ebe relevante.

AMRT ejiste iha tinan 2005, nudar fatin arkivu ba luta Independensia nian, museum ne’e reinagura iha komemorasaun restaurasaun Indepedensia ba dala sanolu ne’ebe hetan inagura husi presidente Timor-Leste, Taur Matan Ruak,  no hetan partisipa husi president Portugal, Aníbal Cavaco Silva, no actual primeiru Ministru, Xanana Gusmão.