Dili, Radio Online, Cerimonia abertura 3º Curso de Formasaun Agentes PNTL ano lectivo 2015 ba membru foun 260, loke husi Sekretariu Estadu Seguransa (SES) Francisco Guiterres, iha Sesta-Feira (16/01/2015) iha Akademia PNTL Comoro Dili.
Formasaun Sei halao durante fulan rua iha Rairobo, Sub-distritu Atabae, Distritu Bobonaro.
Sekretariu Estadu Seguransa Francisco Guiteres hateten iha nia Intervensaun, “ sekarik membru foun sira mak involve iha arte marsiais ou grupu ruma, governu foti desizaun sei hasai tamba ita lakoi atu hodi organizasaun seluk mai estraga ita nia Instituisaun, no hodi organizasaun sira ne’e hanorin at ita nia Juventude sira no komunidade sira,”
“Organizasaun sira ne’e mosu envez de mai atu hanorin, mai atu hametin ita nia kultura, atu hanorin respeita ema nia vida, atu hanorin toleransia, laos hamosu organizasaun atu estraga fali ema nia vida, oho ema hanesan animal, la respeita ona kultura familia, estadu lakoi ida ne’e atu akontese iha ita nia rai, estadu seila tolera ida ne’e, tamba hahalok hanesan ne’e destroi futuru nasaun nian,” dehan SES Francisco.
Francisco mos hateten tan ba membrus foun sira Tenke muda mentalidade “Laiha demokrasia iha Instituisaun PNTL nia laran, so iha Regras, Iha Ordem, no iha regulamentus atu kumpri, atu nune’e polisia tun iha komunidade nia leet tenke hatudu uluk disiplina”
Hatan ba Kazu Mauk Moruk Ho Komandanti Labarik ho nia Membrus sira halo Asaltu ba membru PNTL Kareta rua iha Kinta-Feira(15/1/2015) iha Baukau Laga, SES Francisco Guiteres Iha sesta –feira(16/1/2015) iha Akademia PNTL Komoro hateten tuir Lei ne’e Krime
“ Tuir Autorizasaun lei Hahahalok sira ne’ebe halo Husi Mauk Moruk Ho nia membru sira halo ne’e Krime, Halo Asaltu ba membru PNTL kareta rua no Membru PNTL nain rua dadauk halo hela tratamentu iha Ospital Baukau, ne’ebe hakarak ka lakoi ne’e tenke ba prossesa sira lori ba Tribunal, tamba sira ataka ba Ajentes ordem publiku nian, ” dehan Sekretariu Estadu Seguransa Francisco Guiteres
“Polisia halao nia knaar laiha ema ida atu Ataka fali Polisia no estraga fali Polisia, Tenke buka tuir sira ne’ebe halo krime ne’e no lori ba iha Tribunal, dadaun haruka ona membru PNTL sira ba halo operasaun iha distritu Baukau,” Tenik Francisco.
Iha fatin hanesan Komandante Centro Formasaun Julio Hornai hateten “ preparasaun loos hotu ona, membru foun sira ba tiha atabae, hafoin halao aktividade exersisu fiziku, mak foin longa marsa ba Rai Robo, no faze daruak sei hahu iha Marsu. ”
Membru foun ne’ebe mak preparasaun ona atu tuir formasaun membru Feto hamutuk tolu nolu resin-sia 15 % husi total ne’ebe iha, no mane hamutuk 221.
