Dili, Radio Online, Embaixadora foun Estadus Unidus Amerika (EUA), Karen Clark Stanton, apresenta karta kredensial ba Presidente Repúblika Timor-Leste, Taur Matan Ruak, Sesta feira 16/01/2014, iha Palasio Presidente Aitarak Laran, hodi hametin koperasaun bilateral entre nasaun rua.
“Onra boot no privileziu mai hau, reprezente estadu Unidus sai embasadora ba Timor-Leste,. Ida ne’e kria koperasaun ho nasaun belun Timor-Leste, ami hein katak nasaun rua ne’e ho ninia povu bele hametin relasaun bilateral entre rai rua ne’e ba oin” tenik Clark Stanton
Embaixadora ne’e mos akresenta liu tan katak nia mos iha esperensia direita ho Timor-Leste iha tinan 2002, bainhira estadu Amerika delega nia mai TL hodi instala embaixada Estadus Unidus Amerika iha ne’e.
“Buat ida-ne’e furak teb-tebes bainhira rai ida ne’e bele resolve dezafiu sira no agora Timor-Leste atinji ona progresu boot”. Hateten embaixadora
Nia koalia liu tan katak Estadu Unidus komitidu hodi ajuda povu Timor-Leste atu bele hetan moris di’ak.
Niam informa mos durante ne’e Estadu Unidus opoiu ona Timor-Leste ho osan US $ 400. 000.000.00 hodi ajuda prosesu dezenvolvimentu Timor-Leste nian.
“Nu’udar ambasadora foun, ha’u hakarak kontinua hametin koperasaun bilateral rai rua ne’e nian hodi hametin paz, estabilidade no prosperidade” dehan Clark Stanton.
Clark Stanton simu pose nudar Embaxadora ba TL iha loron 17/12/2014
Iha fatin hanesan, Vise Ministru Negosiu Estranjairu, Costancio Pinto, informa ba jornalista sira katak koperasaun Timor-Leste ho Estadus Unidus Amerika ne’e iha parte boa govenarnasaun nian, apoiu militar, edukasaun, mos koperasaun polítika.
“ho prezensa embaixadora foun EUA ne’e hatudu katak relasaun bilateral entre nasaun rua ne’e lao diak no bele hadia diak liu tan relasaun diplomatika” dehan Pinto.
Vise Ministru Negosiu Estranjairu ne’e mos informa mos katak dadaun ne’e iha Timor-Leste embaixada hamutuk sanolu resin haat (14).
