Komando Jeral PNTL fo Ordem Sirkular ba Polisia Komunitaria

Dili, Radio Online, Superintendente Asst. Xefi Departamentu Polisia Komunitaria, Boavida Ribeiro esplika konaba situasaun sira ne’ebe mak dadaun akontese iha komunidade nia let, iha segunda-feira (19/1/2015) iha nia knar fatin Kuartel Jeral PNTL Kaikoli.

Xefi Departamentu Polisia Komunitaria (DPK), Boavida Ribeiro esplika ba Jornalista Sira dadaun koloka ona ofisial polisia komunitarius suku, hamutuk 238 ne’ebe mak koloka iha territoriu tomak iha 13 munisipius,“dadaun iha Konselho Polisia Komunitariu (KPK) 18, ne’ebe espalla ona iha Munisipiu Sia, aktividades hirak ne’e atu bele kumpri misaun no objektivu komando ninian, hodi haree ba modelu polisiamentu komunitaria, Vizibilidade Involvimentu Profesionalismu,(VIP) ”.

Boavida mos esplika liu tan konaba situasaun sira ne’ebe dadaun akontese iha komunidade nia leet, “ Ita antisipa situasaun sira iha komunidade nia let desde tama ano novo.

DPK hetan ordem sirkular ida husi komando jeral PNTL oinsa atu halo liña kordenasaun ho komando distrital sira iha Munisipiu ida-idak, no oinsa atu bele aktiva no hamoris diak liu tan aktividades Polisia komunitaria ida-idak, liu husi ofisial Polisia suku, liu husi konsellu polisiamentu komunitariu, liu husi konsellu diretiva Distrital”.

“ami mos hatutan ona orientasaun husi Komando Jeral PNTL ba Komando Distrital sira hotu-hotu, hodi aktiva reuniaun priodikamente, hamutuk ho lider komunitariu sira, atu bele detekta informasaun, identifika kauza problemas, atu nune’e haruka informasaun mai iha komando, atu nune’e komando bele dezenha nia planu de intervensaun, planu de operasaun, bazeia ba informasaun polisiamentu komunitarius, ”Tenik Ribeiro.